La regenza beneventa la lavur da notg e da dumengia specificamain per mantegniments. Ella promova mesiras da communicaziun cun la marca graubünden ed ha concedì ina contribuziun chantunala per il project d'in resort da vacanzas a Mustér.

La regenza beneventa la lavur da notg e da dumengia per mantegniments
La regenza ha prendì posiziun tar la midada da l'ordinaziun federala 2 tar la lescha da lavur. L'obligaziun da dumandar ina permissiun per lavur da notg e da dumengia per eliminar disturbis vi da sistems da rait u d'informatica sco er per mantegniments duai vegnir abolida. La regenza sustegna questa stenta da conceder a las interpresas lavur da notg e da dumengia senza permissiun ed uschia senza chargias administrativas. In'extensiun da las excepziuns dal scumond da lavur da notg e da dumengia sto dentant adina vegnir giuditgada criticamain. Correspundentamain stoi vegnir garantì ch'ils engaschaments da notg e da dumengia che na dovran nagina permissiun hajan lieu mo pervia d'in basegn urgent da l'interpresa u pervia d'ina indispensabladad tecnica u economica. La disposiziun sto perquai vegnir revedida. Las premissas per engaschaments che na dovran nagina permissiun ston esser evidentas en moda facila e concreta sin basa da la disposiziun. Ins sto impedir che la nova disposiziun laschia supponer che las collavuraturas ed ils collavuraturs possian exequir senz'auter tut las lavurs – ed uschia er tut ils mantegniments e tut las eliminaziuns da disturbis vi da sistems da rait u d'informatica – durant la notg u la dumengia.

Consultaziuns dal departament federal d'economia, furmaziun e retschertga

Pli stretga collavuraziun tranter ils chantuns da la regiun d'asil da la Svizra orientala en l'avegnir
La regenza ha approvà la cunvegna administrativa tranter ils chantuns Appenzell Dador, Appenzell Dadens, Glaruna, Grischun, Son Gagl, Schaffusa e Turgovia davart la collavuraziun en l'execuziun da spedidas entaifer la regiun d'asil da la Svizra orientala. En il rom da la restructuraziun dal sectur d'asil che entra en vigur il 1. da mars 2019, è la Svizra vegnida dividida en sis regiuns d'asil. Per la regiun d'asil da la Svizra orientala èn previs dus centers federals d'asil permanents – in cun funcziuns proceduralas ad Altstätten SG ed in senza funcziuns proceduralas a Kreuzlingen TG. Ils chantuns pon fixar tranter els ch'els sustegnian cun mesiras persunalas u organisatoricas ils chantuns da staziunament d'in tal alloschi federal en il sectur d'execuziun. Uschia poi vegnir impedì ch'il chantun da staziunament haja durant in temp pli lung grevezzas surproporziunalas cumpareglià cun ils ulteriurs chantuns d'ina regiun e na possia betg pli ademplir sias incumbensas executivas. Ina tala cunvegna è la cunvegna administrativa actuala. Quella regla il sustegn vicendaivel tranter ils chantuns da la regiun d'asil da la Svizra orientala en il sectur da l'execuziun da spedidas da persunas or da la procedura d'asil. En emprima lingia èsi previs ch'ils chantuns mettian a disposiziun in a l'auter en cas da basegn las plazzas d'arrest disponiblas tenor il dretg da persunas estras.

Il chantun promova er vinavant mesiras da communicaziun cun la marca graubünden
Per realisar la campagna da marca "Enavant 4.0" ha la regenza concedì a l'uniun Grischun vacanzas ed al secretariat da la marca graubünden ina contribuziun chantunala da maximalmain 1 milliun francs per onn per ils onns 2019 fin 2022.
Sco proprietari da la marca graubünden èsi impurtant per il chantun ch'i vegnian realisadas er en l'avegnir mesiras da communicaziun ensemen cun partenaris da l'economia, dal turissem e d'auters secturs. Mesiras turisticas vegnan realisadas er vinavant tras Grischun vacanzas. Pli savens duain dentant vegnir realisadas er activitads cun partenaris betg turistics (industria, perscrutaziun, furmaziun, culinarica e.u.v.). Questas mesiras vegnan coordinadas directamain dal secretariat da la marca graubünden. La campagna da marca "Enavant 4.0" persequitescha las suandantas finamiras: augmentar il grad d'enconuschientscha dal Grischun sco lieu attractiv per l'economia e per abitar, ma er sco regiun da vacanzas; prestar ina contribuziun a favur d'ina percepziun positiva da las destinaziuns turisticas; extender la percepziun dal Grischun sin champs tematics ordaifer il turissem; porscher als acturs e partenaris existents e novs dals secturs turissem, economia, industria, furmaziun e perscrutaziun ina plattafurma attractiva, nua ch'els pon sa preschentar.

©littleCITY.ch

Las datas davart ils biotops pon vegnir surdadas a la confederaziun
La regenza ha prendì enconuschientscha dals resultats da la consultaziun concernent l'actualisaziun dals inventaris federals da biotops (palids planivas sco er pastgiras e prads sitgs [PPS]) e dals ulteriurs inventaris da biotops d'impurtanza naziunala. La consultaziun aveva cumenzà ils 24 da matg 2018 ed ha durà 3 mais. Tut en tut èn entradas durant quest temp 1835 propostas per objects singuls da tut ils stgalims d'impurtanza.
Per ils biotops d'impurtanza naziunala èn vegnidas inoltradas totalmain 840 propostas, da quellas 151 per las palids planivas e 523 per objects da PPS. Las 166 propostas restantas per objects naziunals han pertutgà las zonas umidas, las plazzas da fregar per amfibis e las palids autas; quellas aveva la confederaziun revedì gia per il november 2017. Suenter l'evaluaziun da tut las posiziuns entradas èn restads 1086 objects da PPS e 199 objects da palids planivas che dastgassan ademplir ils criteris-clav da la confederaziun per ils inventaris dals biotops correspundents. 8 objects da PPS e 3 objects da palids planivas duain vegnir relaschads dal tuttafatg or dals inventaris federals e chantunals da biotops. 65 objects da PPS e 13 objects da palids planivas duain vegnir declassads ad impurtanza regiunala, perquai ch'els n'adempleschan betg ils criteris-clav da la confederaziun. 3 numers d'objects da PPS pon vegnir stizzads, perquai che las surfatschas appartegnan ad in auter object; las surfatschas sco talas restan però. Plinavant èsi inditgà da declassar 163 objects parzials da palids planivas e 222 objects parzials da PPS ad impurtanza regiunala u locala tenor ils criteris-clav dal chantun. Sin basa da las propostas concernent ils fatgs u concernent las cunfinaziuns exactas hai dà en 335 cas in'adattaziun da las datas en l'inventari naziunal da PPS u da palids planivas.
La regenza propona a l'uffizi federal d'ambient d'integrar en l'inventari federal respectiv las conturas exactas da las palids planivas e dals PPS ch'il chantun ha fixà. Las zonas umidas, las plazzas da fregar per amfibis e las palids autas revedidas vegnan tractadas en il rom d'in pachet da propostas che vegn inoltrà separadamain a la confederaziun per adattar objects dals inventaris federals. Fin la fin da l'onn duai vegnir rectifitgà er l'inventari chantunal dals biotops. L'uffizi per la natira e l'ambient vegn anc a communitgar a mintga proponenta e proponent, tge ch'è succedì cun sia proposta.

Contribuziun chantunala per il project d'in resort da vacanzas a Mustér
Sut il titel "infrastructuras relevantas per il sistem" ha la regenza concedì a la Catrina Resort SA ina contribuziun chantunala da maximalmain 1 milliun francs per construir l'hostel Catrina Resort a Mustér. Il project prevesa da construir in resort da vacanzas cun var 140 abitaziuns da vacanzas explotadas e cun var 160 letgs en chombras da plirs letgs en in hostel. Ultra da las pussaivladads da pernottaziun èn planisads er dus restaurants, in negozi da sport, in sectur da wellness / spa ed ina halla da parcar.
Al resort da vacanzas planisà attribuescha la regenza ina gronda impurtanza ed in grond niz per l'economia publica. En spezial las 50 000 fin 70 000 pernottaziuns che vegnan spetgadas da nov, las 30 novas plazzas d'entir onn che vegnan creadas, il signal per auters projects d'infrastructura en la regiun ed il niz per la gastronomia locala existenta dattan impuls impurtants a l'economia regiunala en la regiun Surselva. Ils custs d'investiziun da la Catrina Resort SA importan tut en tut var 62,2 milliuns francs.

©Catrina Resort SA

Sustegn finanzial per la telecabina da 10 Savognin-Tigignas
Ensemen cun la confederaziun sustegna la regenza la construcziun da la telecabina da 10 Savognin-Tigignas da las Telefericas Savognin SA. Per quest intent ha ella deliberà ina contribuziun chantunala da var 464 000 francs sco prestaziun d'equivalenza a l'emprest federal (2 milliuns francs) en il rom da la nova politica regiunala (NPR).
Cun la construcziun da la telecabina da 10 duai vegnir remplazzada la sutgera da 4 (onn da construcziun 1987) da Savognin a Tigignas. Collià cun quai è in gudogn d'attractivitad per Savognin sco regiun da vacanzas tant l'enviern sco er la stad.

©Telefericas Savognin SA


Gremi: regenza
Funtauna: rg chanzlia chantunala dal Grischun