Quai che ha cumenzà cun 36 spassegiadas en tut il Grischun, vegn ussa cuntinuà. La campagna "Il Grischun va meglier" da l'uffizi da sanadad dal Grischun envida d'explorar las bellezzas dal chantun en il rom da spassegiadas. Ella cumenza cun l'agenda 2019 che cuntegna tips ed occurrenzas per mantegnair la sanadad en tut il chantun.

Sch'ins va a pe, treneschan ins la cundiziun ed augmentan ins la capacitad corporala e spiertala. Ins prevegn a malsognas da la civilisaziun sco corpulenza, pressiun da sang auta u diabetes. Tgi che va a pe, po relaxar e sa recrear meglier. Quai ha er in effect positiv per l'anim e per l'umur. E qua è il punct da partenza da la campagna "Il Grischun va meglier". L'agenda 2019 cuntegna ina schelta da tips e d'occurrenzas che duain facilitar a la populaziun grischuna pli veglia da restar corporalmain, spiertalmain e psichicamain en moviment ed en furma. Il meglier da buna cumpagnia.

L'agenda 2019 en las apotecas e tar ils posts da cussegliaziun da la Pro senectute
Ils tips ed ils exempels d'occurrenzas en tut il chantun animeschan da bandunar las atgnas quatter paraids, ed en il mintgadi regorda l'agenda da far insatge dal bain per sasez e per la sanadad. Las adressas las pli impurtantas en connex cun la sanadad chattan ins er en las differentas regiuns d'ospital. Ina concurrenza motivescha da studegiar pli exactamain las notizias en l'agenda. L'agenda 2019 po vegnir retratga gratuitamain a partir dal 1. da november 2018 en tut las apotecas e tar tut ils posts da cussegliaziun da la Pro senectute dal Grischun.

Spassegiadas online ed offline, la primavaira 2019 er cun accumpagnament
Actualas èn anc adina las spassegiadas da l'atun e da l'enviern sco er da la primavaira e da la stad, ch'èn vegnidas preschentadas l'onn passà. Da nov pon las spassegiadas vegnir chargiadas giu e stampadas ora separadamain a partir dal 1. da november sut www.bischfit.ch/f/senioren. Dals 8 da matg fin ils 26 da zercladur 2019 vegnan ultra da quai purschidas mintgamai la mesemna spassegiadas accumpagnadas en otg regiuns. Er quellas chattan ins sa chapescha en l'agenda. Infurmaziuns pli detagliadas davart l'andament e davart l'annunzia vegnan messas a disposiziun a persunas interessadas la primavaira 2019 sin la pagina d'internet.

En nossa vita giain nus var 40 000 kilometers u circa ina giada enturn il mund a pe. A quest tema sa deditgescha er l'ultima ediziun da Salute, il magazin grischun per sanadad e qualitad da viver. Moviment regular al liber augmenta la segirezza per spassegiar e per esser en gir. E tgi che va a pe a la maisa da mezdi, al referat da sanadad, al suentermezdi da jass u a far las cumissiuns, reducescha il stress, meglierescha la sanadad dal cor e prevegn a la demenza.

Fotografia agiuntada:

©Dani Ammann Photography


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Denise Rudin, manadra da la partiziun "promoziun da la sanadad e prevenziun", uffizi da sanadad dal Grischun, tel. 081 257 64 02, e-mail Denise.Rudin@san.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad