La confederaziun sa participescha a la finanziaziun da mesiras per meglierar l'infrastructura da traffic en citads ed en aglomeraziuns. Per ch'ella fetschia quai, ston las mesiras esser deducidas d'in program d'aglomeraziun. En in tal program d'aglomeraziun vegnan coordinads in cun l'auter il svilup da l'abitadi ed il traffic, e quai resguardond ils effects sin l'ambient. Suenter ina interrupziun da 4 onns duai vegnir elavurà in nov program d'aglomeraziun per l'aglomeraziun da Cuira.

Per l'aglomeraziun da Cuira è vegnì elavurà in program d'aglomeraziun da la 1. ed in da la 2. generaziun. Ils meds finanzials èn vegnids deliberads ils onns 2011 e 2015. La confederaziun ha sustegnì las mesiras da tuts dus programs per 40 pertschient e concedì tut en tut ina contribuziun da 22 milliuns francs. Las mesiras dals programs d'aglomeraziun vegls n'èn anc betg terminadas dal tuttafatg. Tut en tut èn vegnids duvrads fin oz circa 50 pertschient da las contribuziuns federalas garantidas per il program da la 1. generaziun e circa 40 pertschient da quellas per il program da la 2. generaziun. Pervia da quai èsi er vegnì desistì avant circa 4 onns d'elavurar in program d'aglomeraziun da la 3. generaziun. Sin plaun federal han lieu las lavurs da preparaziun per deliberar ils meds finanzials federals per ils programs d'aglomeraziun da la 3. generaziun; il conclus respectiv dal parlament vegn prendì previsiblamain la primavaira u la stad 2019.

En vista ad in program d'aglomeraziun da la 4. generaziun èn vegnids sclerids en il decurs da quest onn il potenzial da mesiras adattadas, la prontezza da las regiuns e da las vischnancas per la participaziun persunala e finanziala sco er l'organisaziun entaifer l'aglomeraziun da Cuira, e quai integrond las regiuns pertutgadas Plaun, Plessur e Landquart. Sco resultat èn las regiuns ed il chantun sa declerads pronts da prender per mauns l'elavuraziun d'in program d'aglomeraziun da la 4. generaziun. Sin fundament da las infurmaziuns che stattan actualmain a disposiziun ston ils programs d'aglomeraziun da la 4. generaziun vegnir inoltrads ils 15 da zercladur 2021. Suenter ch'els èn vegnids examinads positivamain ed acceptads ston las mesiras dals programs d'aglomeraziun vegnir realisadas ils onns 2024 fin 2027. Sco proxim pass vegn fatga la publicaziun uffiziala per surdar l'incumbensa da planisaziun externa per elavurar in program d'aglomeraziun da la 4. generaziun. Las lavurs duain cumenzar la primavaira 2019.


Infurmaziuns:
- Richard Atzmüller, manader da l'uffizi per il svilup dal territori, tel. 081 257 23 21, e-mail Richard.Atzmueller@are.gr.ch
- dr. Boris Spycher, manader dal project / collavuratur scientific, tel. 081 257 23 06, e-mail Boris.Spycher@are.gr.ch


Gremi: uffizi per il svilup dal territori
Funtauna: rg uffizi per il svilup dal territori