Sin invit da la regenza ha l'ambassadur ungarais, István Nagy, visità oz il chantun Grischun.

L'ambassadur ungarais István Nagy è vegnì beneventà oz en la Chasa grischa a Cuira dal president da la regenza Mario Cavigelli e dal chancelier Daniel Spadin. L'ambassadur è vegnì accumpagnà da dr. Bálint Czékus, substitut da l'ambassadur. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants d'auters stadis en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: dr. Bálint Czékus, substitut da l'ambassadur, ambassadur István Nagy, president da la regenza Mario Cavigelli e chancelier Daniel Spadin.


Infurmaziuns:
Daniel Spadin, chancelier, tel. 081 257 22 21, e-mail Daniel.Spadin@staka.gr.ch


Gremi: regenza
Funtauna: rg chanzlia chantunala