Ils posts d'egualitad dal Grischun, dal Vorarlberg, dal district Bodensee, da Constanza e dal Liechtenstein han inizià la primavaira 2017 il project d'interreg "Rait da quatter pajais". Quest project d'interreg transcunfinal ha la finamira da rinforzar ils posts d'egualitad en ils quatter pajais e da stgaffir ina structura da rait permanenta. Ils 29 da november vegn il project terminà en il museum naziunal a Vaduz en il rom d'ina occurrenza.

Il punct da partenza da la collavuraziun transcunfinala en il sectur da l'egualitad tranter dunna ed um è stà ils onns 1990. Dapi l'onn 1999 fan ils posts d'egualitad dal Grischun, dal Vorarlberg, da Constanza e dal district Bodensee diever dal program d'interreg per realisar e francar cuminaivlamain projects d'egualitad. Latiers tutgan projects sco "Surpassar cunfins – metter cunfins" che tematiseschan la violenza, u il project "betrifft: Frauen entscheiden" ch'è vegnì terminà pir dacurt.

Mussà las midadas da l'egualitad
La lavur instituziunala da dunnas resp. d'egualitad da las autoritads e da las regenzas ha ina tradiziun da differenta durada en ils quatter pajais. Las structuras en il sectur da dunnas e d'egualitad èn sa midadas radicalmain ils ultims onns en intgins dals pajais participads. Cun il project "Rait da quatter pajais" è la midada vegnida mussada ed analisada. Plinavant èsi vegnì preschentà, co che la structura existenta s'effectuescha. En trais lavuratoris han ins definì las finamiras ed ils success cuminaivels, fixà la structura futura da la collavuraziun e determinà champs d'acziun che vegnan tematisads cuminaivlamain en il proxim futur. A chaschun da l'occurrenza da finiziun dals 29 da november vegni preschentà, co che la collavuraziun futura concreta guarda ora.

Referat davart la convenziun da dunnas da la ONU
Per questa occurrenza è vegnida envidada Patricia Schulz. Ella è l'anteriura directura da l'uffizi federal per l'egualitad tranter dunna ed um sco er commembra da la cumissiun spezialisada da las Naziuns Unidas (ONU) per la convenziun davart l'eliminaziun da tut las furmas da discriminaziun cunter dunnas (CEDAW). L'experta cumprovada en il sectur da l'egualitad sin plaun naziunal ed internaziunal vegn a salvar in referat davart il tema "Dretgs da las dunnas en in mund globalisà – il sguard or da la cumissiun da la CEDAW, sia lavur e sias sfidas". Plinavant mussa ella tge incumbensas che la cumissiun da la ONU ademplescha, tge rolla che las organisaziuns nunguvernamentalas han en la lavur da la cumissiun e cun tge sfidas che la ONU è confruntada actualmain.

Annunzia per l'occurrenza
L'occurrenza da finiziun ha lieu gievgia, ils 29 da november 2018, a las 18.00 en il museum naziunal a Vaduz. L'occurrenza è publica. Igl è dentant necessari da s'annunziar per e-mail sut info@cg.llv.li u per telefon sut +423 236 60 60.


Infurmaziuns:
Tamara Gianera, manadra dal post da stab per l'egualitad da las schanzas, tel. 081 257 35 71, e-mail Tamara.Gianera@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas