La regenza ha incumbensà la SAPGR da porscher ina nova scolaziun cumplementara a la professiun per il stgalim secundar I ed ha renovà l'incarica da prestaziun cun Grischun vacanzas. Plinavant ha ella approvà in project da vias per reparar la via da Brinzauls.

Ina nova scolaziun cumplementara a la professiun per il stgalim secundar I a la SAPGR
La scola auta da pedagogia dal Grischun (SAPGR) vegn incumbensada da realisar en cooperaziun cun la scola auta da pedagogia da Son Gagl dal 1. da settember 2019 fin ils 31 d'avust 2022 la scolaziun cumplementara a la professiun sco persuna d'instrucziun per il stgalim secundar I. Questa scolaziun sa drizza a persunas d'instrucziun che instrueschan actualmain sin il stgalim secundar I senza in diplom che correspunda al stgalim u che vulan midar dal stgalim primar al stgalim secundar I.
Per bleras vischnancas da scola dal Grischun èsi anc adina difficil da chattar persunas d'instrucziun per il stgalim secundar I che han in diplom correspundent. Las persunas d'instrucziun da la scola primara pon actualmain far la scolaziun cumplementara a la professiun sco persunas d'instrucziun per il stgalim secundar I mo a las scolas autas da pedagogia da Turitg e da Son Gagl. En spezial per persunas d'instrucziun da la scola primara en las regiuns periferas dal Grischun resultan temps da viadi fitg lungs, uschia che mo paucas persunas d'instrucziun fan diever da questa purschida. Ils scleriments preliminars che la SAPGR ha fatg la primavaira 2018 han mussà che 62 persunas han actualmain interess da far ina tala scolaziun.

Grischun vacanzas survegn ina nova incarica da prestaziun per 2019–2022
La regenza ha renovà l'incarica da prestaziun cun l'uniun Grischun vacanzas (GRV) per ils onns 2019–2022. A GRV vegnan concedidas vinavant ina contribuziun chantunala ordinaria da 6 milliuns francs per onn e da nov ina contribuziun chantunala supplementara da 0,5 milliuns francs per l'onn 2019, respectivamain da mintgamai 1 milliun francs per ils onns 2020 fin 2022.
La contribuziun chantunala vegn augmentada per ch'i possian vegnir prendidas mesiras en il sectur da l'internaziunalisaziun. GRF vul etablir cun success l'elavuraziun dals martgads lontans (Stadis dal Golf, China, USA). Areguard las plazzas da lavur ed areguard la valurisaziun vala il turissem vinavant sco ina da las pitgas las pli impurtantas da l'economia publica dal Grischun. L'uniun GRF gioga en quest connex ina rolla centrala per las activitads da commerzialisaziun che cumpiglian pliras destinaziuns e che s'orienteschan a la clientella. Cun la nova incarica da prestaziun vegni garantì che GRF possia realisar las activitads currentas er suenter il schaner 2019 e ch'i possia vegnir fatga ina planisaziun da las mesiras a media vista.

Via da Brinzauls vegn sanada
La regenza ha approvà il project da vias per reparar la via da Brinzauls cun intginas cundiziuns sco er cun las permissiuns spezialas. La via da Brinzauls collia la fracziun da Brinzauls da la vischnanca dad Alvra cun la rait da vias chantunalas. Il project qua avant maun cumenza curt suenter il vitg da Brinzauls e s'extenda fin a la plazza da parcar da la ruina Belfort. La via da Brinzauls traversa in territori da bovas activ. Ils spustaments chaschunan regularmain donns vi dal trassé. Sin quest traject èn vegnidas fatgas ils ultims onns mo las lavurs da mantegniment necessarias. La via sa chatta actualmain en in stadi fitg nausch. Cun il project qua avant maun duai la via da Brinzauls vegnir sanada tenor il standard da construcziun ch'è fixà per questa via. La ladezza da la via existenta variescha tranter 5,40 e 5,70 meters. Da nov duai la via vegnir schlargiada ad ina ladezza da 5,80 meters. La sanaziun planisada prevesa da renovar tut la surstructura sco er d'optimar la geometria en ils secturs spustads e defurmads. Per che l'allontanament da l'aua funcziunia dapertut, vegn il conduct d'aua da sfundrada e d'aua da transport defect remplazzà cumplettamain. Ils custs totals dal project importan circa 950 000 francs.

Contribuziun chantunala per augmentar la valur ecologica da las auas a Cazas
A la vischnanca da Cazas vegn garantida ina contribuziun chantunala da maximalmain 1,3 milliuns francs per augmentar la valur ecologica dal conduct d'affluenza Munté e dal chanal. Ils onns 2013/14 è vegnida fatga ina vista cumplessiva per augmentar la valur ecologica da las auas da la val da Cazas. Il project qua avant maun realisescha ina part da las mesiras proponidas. Il project cumpiglia las auas da la deflussiun da l'aual da Cazas, dal conduct d'affluenza e dal chanal fin al tumbin a la clinica Beverin. I vegnan persequitadas tant finamiras ecologicas sco er idraulicas sco per exempel l'apport d'ina quantitad suffizienta d'aua al territori da protecziun Munté, ina sauaziun per las puras ed ils purs sco er ina protecziun adequata cunter aua gronda.


Gremi: regenza
Funtauna: rg chanzlia chantunala dal Grischun