Il program da lavur "Perspectiva generala per la Svizra orientala" è vegnida suttascritta oz dal president da la regenza Mario Cavigelli, da las represchentantas e dals represchentants dals chantuns participads sco er da las VFF.

La "Perspectiva generala per la Svizra orientala" è in program da lavur en il sectur dal traffic public tranter ils chantuns Grischun, Schaffusa, Son Gagl e Turgovia sco er las Viafiers federalas svizras (VFF) cun in orizont da planisaziun fin l'onn 2030. En quest connex èn vegnidas definidas perspectivas cumplessivas per la Svizra orientala, quai che stgaffescha ina furma da planisaziun entretschada. La finamira è quella da crear plivalurs per la clientella, per ils chantuns participads e per las citads involvidas sco er per las VFF. En il focus dal program da lavur stat la purschida futura dal traffic da persunas e da rauba cun l'infrastructura da viafier ch'è necessaria per quest intent. A medem temp vegn discutà il svilup dals areals da las staziuns.

Mesiras planisadas per il Grischun
Differentas mesiras da l'infrastructura duain augmentar la capacitad e la stabilitad dal traffic public en il chantun Grischun. Ultra da quai duain vegnir purschidas chadainas da transport pli sveltas e pli agreablas. En spezial duai la colliaziun dal chantun Grischun cun Turitg vegnir meglierada e concentrada ad in tact permanent d'ina mes'ura. A la staziun da Cuira prevesa il program da lavur la dischlocaziun dal punct da chargiada libra Kettweg sin il territori al nord da las Ovras da Domat. L'areal che stat suenter a disposiziun sco er las surfatschas supplementaras che cunfineschan cun quel han – grazia a la posiziun centrala en vischinanza da la staziun – in caracter strategic per il svilup architectonic da la citad. In ulteriur punct dal program da lavur concerna la staziun da Landquart. Cun il sustegn da las VFF prevesa il chantun Grischun da concentrar architectonicamain las surfatschas enturn la staziun da Landquart e da stgaffir nov spazi d'abitar e da lavur. Ultra da quai è ina buna colliaziun cun il traffic da persunas e da rauba a Landquart d'impurtanza centrala per ils partenaris. Il svilup en quest sectur dat la schanza d'augmentar l'occupaziun dals trens.

Ulteriuras infurmaziuns: uffizi d'energia e da traffic


Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch  


Gremi: departament da construcziun, traffic e selvicultura
Funtauna: rg departament da construcziun, traffic e selvicultura