La regenza grischuna ha nominà Fabian Disch sco nov manader da l'administraziun chantunala da finanzas. El vegn a surpigliar questa funcziun il 1. d'avrigl 2019.

La regenza grischuna ha elegì Fabian Disch da Grüsch e Schiers sco nov manader da l'administraziun da finanzas dal chantun Grischun. Disch ha 32 onns ed è econom da manaschi diplomà SSS.

El mida da l'administraziun communala al plaun chantunal. Passa 12 onns gia lavura el cun success per la vischnanca da Landquart en differentas posiziuns en il sectur da las finanzas. El ha enconuschientschas fundadas da las finanzas publicas sco er experientscha da project e da direcziun. El abita a Landquart. Fabian Disch succeda ad Andrea Seifert che daventa il 1. d'avrigl 2019, suenter 11 onns, directur da la cassa da pensiun dal Grischun.

L'administraziun da finanzas è responsabla per ils fatgs centrals da finanzas e da contabilitad sco er per il rendaquint da l'administraziun chantunala. Tar las incumbensas impurtantas tutgan er la budgetaziun ed il management da la tresoraria. Plinavant s'occupa l'administraziun da finanzas sco autoritad da surveglianza da las fundaziuns classicas, sco post spezialisà central dals fatgs d'assicuranza dal chantun e sco post da coordinaziun per realisar la public corporate governance.

L'administraziun da finanzas è in post da servetsch dal departament da finanzas e vischnancas.
 
Fotografia agiuntada:

Fabian Disch


Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, a partir dal 1. da schaner 2019 schef dal departament da finanzas e vischnancas, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala dal Grischun