A Milaun èn il president da la regenza Mario Cavigelli ed il cusseglier guvernativ Jon Domenic Parolini vegnids beneventads ier d'ina delegaziun da la regiun Lumbardia per discutar davart differents temas transcunfinals.

Mario Cavigelli e Jon Domenic Parolini èn vegnids beneventads dal president da la regiun Lumbardia Attilio Fontana, dals commembers da la regenza regiunala Massimo Sertori (corporaziuns publicas e territoris da muntogna) e Claudia Maria Terzi (infrastructura e traffic) sco er dal president da la provinza da Sondrio Elio Moretti.

La scuntrada ha gì l'intent da discutar il stadi da la realisaziun da la cunvegna (intesa). Quella è vegnida suttascritta ils 16 da mars 2017 a Tirano e pertutga il svilup dal traffic public regiunal e transcunfinal.

Vegnidas discutadas èn en spezial las proximas mesiras per optimar las colliaziuns e las purschidas dal traffic public transcunfinal, ina meglra collavuraziun dals partenaris en il rom dals projects d'Interreg e la restructuraziun previsa da la staziun da la Viafier retica a Tirano. A medem temp ha la scuntrada dà l'occasiun d'approfundar las bunas relaziuns existentas tranter la regiun Lumbardia ed il chantun Grischun.

Fotografia agiuntada:

Da sanestra: Massimo Sertori, cusseglier guvernativ Jon Domenic Parolini, Claudia Maria Terzi, president da la regenza Mario Cavigelli, president da la regiun Lumbardia Attilio Fontana und president da la provinza da Sondrio Elio Moretti.


Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura