La regenza ha prendì posiziun tar la midada planisada da l'ordinaziun davart la part generala dal dretg d'assicuranza sociala en quai che reguarda la surveglianza da persunas assicuradas. Plinavant vuless la regenza meglierar en moda duraivla l'effizienza ecologica dal parc chantunal d'autos da persunas. Ultra da quai ha ella concedì ina contribuziun chantunala per il Di dal sport grischun 2020.
Las basas giuridicas per l'observaziun ston vegnir revedidas
La regenza ha prendì posiziun tar la revisiun da la ordinaziun davart la part generala dal dretg d'assicuranza sociala. L'ordinaziun duai precisar las basas legalas per pudair survegliar persunas assicuradas che vegnan suspectadas da retrair illegalmain prestaziuns.
Il project dal departament federal da l'intern (DFI) vul d'ina vart definir las pretensiuns envers las spezialistas ed ils spezialists ch'ils assicuraders dastgan incaricar cun observaziuns. Da l'autra vart èsi da fixar la procedura per pudair prender invista da tut il material d'observaziun sco er da reglar la conservaziun e la destrucziun da quest material.
La regenza refusa il sboz e pretenda ch'il project vegnia revedì. In motiv essenzial per quai è l'introducziun previsa d'ina obligaziun da dumandar ina permissiun per las spezialistas ed ils spezialists externs che l'assicurader po incaricar cun l'observaziun. Tenor l'avis da la regenza n'exista nagina basa legala per l'introducziun d'ina tala obligaziun da dumandar ina permissiun. Plinavant na para ina tala obligaziun betg cunvegnenta, perquai ch'ils instituts d'assicuranza sociala ston sezs guardar ch'els incaricheschian mo spezialistas e spezialists che adempleschan las pretensiuns. Ultra da quai sto vegnir refusada l'installaziun d'in register da spezialistas e spezialists, perquai che persunas che fan abus d'assicuranzas pudessan uschia sa preparar sin observaziuns.
Documents da consultaziun dal DFI
Vehichels electrics per l'administraziun chantunala
La regenza ha approvà l'actualisaziun dal plan da mesiras en il sectur da l'igiena da l'aria. Tranter auter dat ella uschia glisch verda a la nova mesira da traffic "Plan per reducir il consum da carburant e las emissiuns dal parc chantunal d'autos da persunas". A partir da l'onn 2019 duai il consum vegnir reducì mintga onn per 5 pertschient. Uschia duain las emissiuns nuschaivlas vegnir sbassadas en moda successiva e duraivla. Facticamain pudessan passa 50 pertschient dals viadis d'in di vegnir fatgs gia oz senza las minimas restricziuns cun in vehichel electric, quai che reduciss cleramain il consum e las emissiuns dal parc da vehichels.
La realisaziun concreta da questa nova mesira da traffic ha lieu en il rom dal management da mobilitad manaschial (MMM) dal chantun. En connex cun l'elavuraziun dal MMM ha il chantun interrogà il mars 2018 tut las collavuraturas e tut ils collavuraturs cun l'intent da drizzar meglier las purschidas e las mesiras da mobilitad tenor ils basegns da las emploiadas e dals emploiads e per pudair furnir a medem temp ina contribuziun relevanta a la reducziun dal consum d'energia.
Contribuziun chantunala per il Di dal sport grischun 2020
Per ils custs da l'organisaziun chantunala per il Di dal sport grischun 2020 ha la regenza concedì ina contribuziun da 108 000 francs a l'associaziun grischuna da sport or da la finanziaziun speziala "sport".
En la lescha chantunala davart la promoziun dal sport èsi francà che la conscienza da la populaziun per ils effects positivs dal sport duai vegnir rinforzada. Sco mesira respectiva organisescha il chantun – ensemen cun las uniuns e cun las federaziuns grischunas da sport – in "Di dal sport grischun" per promover l'identitad. L'emprim Di dal sport grischun è vegnì realisà cun success l'onn 2018. 4000 fin 5000 amaturas ed amaturs grischuns dal sport èn sa participads en otg differents lieus.
Halla da gimnastica da Samedan al Di dal sport grischun 2018
La basa per il mantegniment da las vias a Roveredo vegn engrondida
Cun cundiziuns e cun permissiuns spezialas ha la regenza dà glisch verda al project per engrondir la basa per il mantegniment da las vias da l'uffizi da construcziun bassa a Roveredo. Questa basa è en cumproprietad da l'uffizi federal da vias UVIAS e da l'uffizi da construcziun bassa. L'areal existent duai vegnir extendì, d'ina vart per pudair tegnair quint da l'augment dals basegns da mantegniment ch'èn resultads tras l'avertura dal nov traject da la via naziunala per il sviament da Roveredo, da l'autra vart per pudair garantir ina meglra dismessa dal rument che deriva dal nettegiament da las vias.
Il project cumpiglia la construcziun d'ina plazza davantvart e d'in stabiliment per rimnar il rument che deriva dal mantegniment da las vias. Pervia da l'engrondiment da la plazza davantvart sto vegnir dischlocà l'access actual da la serenera da la via naziunala N13. Quest access vegn realisà al vest da la plazza davantvart. Ils custs totals dal project importan circa 389 000 francs. 284 000 francs van a quint da la confederaziun e 105 000 francs a quint dal chantun.
Gremi: regenza
Funtauna: rg chanzlia chantunala dal Grischun