Ils trais lufs giuvens ch'èn vegnids chattads morts l'atun tar l'alp da Trin na tutgan betg tar il triep dal Calanda. Las analisas geneticas conferman uschia in segund triep da lufs en il chantun.

L'analisa da labor mussa ch'ils trais lufs giuvens ch'èn crudads giu l'atun tar l'alp da Trin n'èn betg descendents dals dus animals geniturs M30/F07 dal triep dal Calanda. Uschia sa conferma la supposiziun ch'igl è sa furmà quest onn in nov triep da lufs en il Grischun sin il territori communal da Trin. Sch'i existan anc ulteriurs lufs giuvens da quest triep e nua ch'ils dus animals geniturs sa chattan per il mument, n'è fin ussa betg enconuschent.

Ultra da las sgrifladas da la pel e da las ruttadiras d'ossa chaschunadas da la crudada n'han las analisas purtà fin ussa naginas autras enconuschientschas per la raschun da la mort. Ils resultats da l'analisa davart la pesta da chauns n'èn anc betg avant maun.

Sin basa da las observaziuns da quest onn e pervia da las analisas fatgas en quest connex stoi probablamain vegnir fatg quint il proxim temp cun ulteriurs trieps da lufs en il Grischun.


Infurmaziuns:
dr. Adrian Arquint, schef da l'uffizi da chatscha e pestga, tel. 081 257 38 92, e-mail Adrian.Arquint@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga