Las quantitads da naiv surproporziunalmain grondas chaschunan en bleras regiuns dal chantun Grischun situaziuns da viver fitg pretensiusas per la selvaschina. Ussa èsi fitg impurtant d'evitar disturbis per ils animals selvadis. L'uffizi da chatscha e pestga examinescha, sch'i èn inditgadas – sper evitar disturbis – ulteriuras mesiras per tegnair la selvaschina en il spazi da viver natiral.

Suenter plirs dis cun navaglias hai actualmain en il Grischun dal nord extraordinariamain blera naiv. Quella restrenscha massivamain la libertad da sa mover da la selvaschina e difficultescha la tschertga da pavel. La surveglianza chantunala da chatscha e l'organisaziun per la tgira da la selvaschina da l'uniun grischuna da chatschaders da patenta (UGCP) observan cun quità ils spazis da viver d'enviern pertutgads dals animals.

Cuntrari a l'onn passà han ils animals selvadis cumenzà l'enviern en buna cundiziun, suenter in atun cun in decurs optimal e cun bler pavel. Decisiv per pudair surviver èsi ussa, che la selvaschina dovria uschè pauca energia sco pussaivel e possia qua tras surviver cun fitg pauc pavel. Ella dovra ussa cunzunt paus ed ella duess restar en ses spazis da viver d'enviern natirals. Perquai èsi fitg impurtant ch'ils animals selvadis na vegnian betg disturbads.

L'uffizi da chatscha e pestga supplitgescha la populaziun ed en spezial er las sportistas ed ils sportists da naiv
- da betg disturbar ils spazis da viver dals animals selvadis,
- d'observar strictamain las zonas da paus per la selvaschina che las vischnancas han determinà, e
- da tegnair ils chauns sche pussaivel adina a la tschinta.

Sche la situaziun duess sa pegiurar vinavant, vegnan instradadas sistematicamain ulteriuras mesiras, sco per exempel scumonds d'access sco er il pinar singuls bostgs per pavel u il metter a disposiziun fain directamain en ils spazis da viver, per quietar supplementarmain ils spazis da viver d'enviern. Tut tenor co che l'aura sa sviluppa e co che la selvaschina sa cumporta po il chantun ordinar immediatamain questas mesiras.

I n'è betg inditgà da permetter a persunas privatas u a puras e purs da pavlar ils animals. Il cuntrari: Il pavel carmala ils animals or da lur spazis da viver d'enviern. Tras quai dovran els dapli energia ch'els pon prender si cun il pavel. A medem temp sa mettan ils animals en grond privel, sch'els traversan vias e binaris per cuntanscher il pavel mess a disposiziun.
 
Pagina d'internet cun infurmaziuns: www.stop-fuetterung.ch


Infurmaziuns:
- dr. Adrian Arquint, schef da l'uffizi da chatscha e pestga dal Grischun, tel. 081 257 38 92, e-mail Adrian.Arquint@ajf.gr.ch
- Hannes Jenny, biolog da selvaschina, uffizi da chatscha e pestga dal Grischun, tel. 081 257 38 92, e-mail Hannes.Jenny@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga