Tras la construcziun d'in nov trottuar daventa il center dal vitg da Domat pli segir per las pedunas ed ils peduns. En connex cun lavurs da sanaziun voluminusas vegnan plinavant renovads la surstructura da la via, che n'è betg resistenta a la schelira sco er ils conducts d'aua. A medem temp metta la corporaziun da chalur da Domat conducts da chalur a distanza. Las lavurs da construcziun cumenzan ils 4 da mars e duran probablamain fin mez december.

Il traject pertutgà d'ina lunghezza da circa 420 meters cumenza tar l'immobiglia Via Nova 93, visavi il Coop, e maina per lung dal center dal vitg cun il center cultural ed ecclesiastic Sentupada, cun la baselgia sco er cun plirs affars sco l'apoteca, la banca e restaurants, fin la Via Nova 34.

Grondas pretensiuns envers la concepziun
Cun questa correcziun da la via stgaffescha l'uffizi da construcziun bassa ina colliaziun senza interrupziun per pedunas e peduns e stabilisescha a medem temp las stretgas nunsurvesaivlas. La surstructura da la via, che n'è betg resistenta a la schelira vegn renovada cumplettamain e la via vegn optimada, uschenavant che la structura dal vitg permetta quai. La renovaziun vegn fatga cun la finamira da schanegiar il meglier pussaivel la substanza architectonica existenta. Tenor il plan da zonas da la vischnanca da Domat sa chatta il traject pertutgà en il "areal da furmaziun cun pretensiuns pli grondas". Las plazzas che cunfineschan cun la via survegnan ina salaschada. Uschia sa differenzieschan ellas opticamain meglier da la via ed embelleschan ed augmentan la valur dal center dal vitg.

Novs conducts d'aua e da chalur a distanza
Ils motivs per las lavurs da construcziun èn ultra da la via che sto vegnir sanada, ils conducts d'aua che ston vegnir remplazzads sco er ils novs conducts da chalur a distanza che duain vegnir mess per proveder Domat en il futur cun chalur persa da las Ovras da Domat SA e da la Axpo Tegra. La via vegn sanada en cooperaziun tranter l'uffizi da construcziun bassa dal Grischun (vial) e la vischnanca da Domat (trottuars, plazzas cunfinantas e conducts d'ovra). La Rhiienergie SA profita da l'occasiun per metter sia rait da conducts sin il stadi il pli actual da la tecnica.

Il Fegl d'infurmaziun da l'uffizi da construcziun bassa dal Grischun cuntegna infurmaziuns detagliadas davart las etappas planisadas, davart las serradas e davart las deviaziuns. La charta e la glista actuala dals plazzals pon vegnir consultadas sut www.strassen.gr.ch. Ellas cuntegnan medemamain indicaziuns davart las lavurs e davart ils impediments sin las vias chantunalas en il Grischun.

Agiunta:

Nova concepziun da la stretga "Krone" cun ina via pli segira per peduns


Infurmaziuns:
- Reto Knuchel, inschigner chantunal, uffizi da construcziun bassa dal Grischun, tel. 081 257 37 01, e-mail Reto.Knuchel@tba.gr.ch
- Gion Hagmann, schef dal mantegniment da vias, uffizi da construcziun bassa dal Grischun, tel. 081 257 37 35, e-mail Gion.Hagmann@tba.gr.ch


Gremi: uffizi da construcziun bassa
Funtauna: rg uffizi da construcziun bassa