La stagiun da construcziun cumenza puspè. La rait da vias chantunalas vegn renovada ed extendida. L'uffizi da construcziun bassa dal Grischun planisescha sin la rait da vias chantunalas d'ina lunghezza da passa 1400 kilometers 74 plazzals sin vias principalas e 96 plazzals sin vias da colliaziun. Tar 89 plazzals vegn il traffic reglà cun amplas.

Cun las temperaturas pli chaudas crescha er il dumber da plazzals sin vias. La finala profitan tut las participantas ed ils participants dal traffic, sche la vasta rait da vias chantunalas è segira e funcziuna. Tuttina chaschunan questas lavurs savens impediments da la circulaziun malempernaivels.

Segirezza sin ils plazzals da vias
Ils plazzals sin las vias èn ultra da quai ina ristga d'accidents – betg mo per il traffic, mabain er per las lavurantas ed ils lavurants da las interpresas da construcziun da vias e dals servetschs da mantegniment. Il potenzial da privels vegn savens sutvalità u simplamain resguardà memia pauc. Perquai supplitgeschan l'uffizi da construcziun bassa e las interpresas involvidas las participantas ed ils participants dal traffic d'agir cun responsabladad e da sa cumportar confurm a la situaziun sco er da prender resguard da las lavurantas e dals lavurants cun vestgadira d'avertiment e da protecziun.

Infurmaziuns detagliadas sin la pagina d'internet da l'uffizi da construcziun bassa
Il Fegl d'infurmaziun da l'uffizi da construcziun bassa cuntegna infurmaziuns detagliadas en chaussa. La charta e la glista da plazzals actuala cun indicaziuns detagliadas davart las lavurs e davart ils impediments pon vegnir consultadas sut www.strassen.gr.ch. Correspundentamain dain nus gronda impurtanza a la circulaziun dal traffic durant la fasa da construcziun e supplitgain las participantas ed ils participants dal traffic d'avair chapientscha per eventuals temps da spetga durant las lavurs da construcziun.

Fotografia:

Lavurs cun pitgas furadas al chant da Rona da la via dal Güglia


Infurmaziuns:
Nadja Wielath, responsabla per las medias, uffizi da construcziun bassa dal Grischun, tel. 081 257 37 03, e-mail Nadja.Wielath@tba.gr.ch  


Gremi: uffizi da construcziun bassa
Funtauna: rg uffizi da construcziun bassa