Sin la via d'Engiadina è capitada sonda, ils 16 da mars 2019, circa a las 16.00, ina crudada da grippa da var 800 meters cubic. Pervia da quai sto la via d'Engiadina tranter Martina ed Ovella vegnir serrada per tut il traffic per pliras emnas. Igl exista ina pussaivladad da sviar signalisada sur Danuder (A) e Fuond (A).

La crudada da grippa ha sutterrà la via d'Engiadina tranter Martina ed Ovella sin ina lunghezza da var 20 meters cun ina massa da grip d'ina autezza da fin ad 8 meters. Donns da persunas n'hai dà nagins. Singuls blocs han in volumen da plirs tschient meters cubic. Il bloc da cabels che sa chatta en la via e che cuntegna tranter auter lingias da telecommunicaziun n'è – tenor il stadi da las enconuschientschas actualas – betg vegnì donnegià u mo levamain.

La via dastgass esser donnegiada fermamain da la crudada da grippa. Actualmain vegnan fatgs ils scleriments geologics necessaris per las proximas lavurs. Tenor las emprimas enconuschientschas han las precipitaziuns fermas dals ultims dis sco er ils ciclus actuals da schelira e da sdregliada chaschunà la crudada da grippa. Per segirar la zona da sbuvada sco er per las lavurs da rumida e da reparaziun, per las qualas singuls blocs ston er vegnir siglientads, sto la via vegnir serrada per pliras emnas.

Inspecziun per collavuraturas e collavuraturs da las medias
Per collavuraturas e collavuraturs interessads da las medias ha lieu mardi, ils 19 da mars 2019, ina inspecziun dal territori da crudada da grippa. Partenza è a las 10.00 sin la plazza da parcar tar la staziun da duana Martina.

Infurmaziuns actualas davart il stadi da las vias e davart ils impediments dal traffic pon vegnir consultadas sin la pagina d'internet www.strassen.gr.ch. Las interpresas participadas e l'uffizi da construcziun bassa dal Grischun supplitgan las participantas ed ils participants dal traffic d'avair la chapientscha duida per las restricziuns durant las lavurs da reparaziun.

Fotografias agiuntadas:

Crudada da grippa tranter Martina ed Ovella


Infurmaziuns:
- Elia Lardi, schef dals servetschs da l'uffizi da construcziun bassa dal Grischun, tel. 081 257 37 10, e-mail Elia.Lardi@tba.gr.ch
- Jachen Kienz, schef da l'uffizi districtual da construcziun bassa 4 Scuol, tel. 081 257 69 57, e-mail Jachen.Kienz@tba.gr.ch


Gremi: Departament da construcziun, traffic e selvicultura dal Grischun
Funtauna: rg departament da construcziun, traffic e selvicultura