La regenza ha prendì posiziun tar in project da via da la confederaziun a Landquart. Ultra da quai ha ella deliberà ina contribuziun chantunala per construir in hostel da wellness a Laax ed ha dà glisch verda per l'instrucziun da rumantsch sin il stgalim secundar I a Domat.

Mesiras cunter stagnaziun tar l'access a las vias naziunalas a Landquart
La regenza ha prendì posiziun tar in project da consultaziun dal departament federal per ambient, traffic, energia e communicaziun concernent mesiras per eliminar la situaziun da stagnaziun tar l'access a las vias naziunalas N13 ed N28 a Landquart. Il project planisà da la confederaziun cumpiglia il sectur da la rundella ost. Per tegnair quint dal volumen da traffic actual e futur èn gia vegnidas prendidas là differentas mesiras provisoricas. Uschia èn vegnidas realisadas differentas mesiras immediatas che ston ussa vegnir amplifitgadas. Previs è in vial d'access pli lung per il traffic che sviescha a dretga en direcziun da Tavau. Plinavant duai vegnir transfurmà l'access existent a l'edifizi da la Viafier retica planisà. Ultra da quai duai il traject d'acceleraziun tar la colliaziun Karlihof vegnir prolungà e – sco consequenza da quai – duai la via chantunala vegnir adattada. Il temp da construcziun da tut las mesiras duai importar circa nov mais.
La regenza beneventa il project d'execuziun da l'uffizi federal da vias. L'eliminaziun da la situaziun da stagnaziun a Landquart ha ina gronda prioritad ord vista dal chantun. Ensemen cun il nov trassé dal traffic betg motorisà gia realisà da la confederaziun e dal chantun en il perimeter pertutgà permettan las mesiras planisadas da meglierar ils andaments d'entretschament e la circulaziun dal traffic sco er d'augmentar la segirezza dal traffic.

© Uffizi federal da topografia

Contribuziun chantunala per construir in hostel da wellness a Laax 
Sut il titel "infrastructuras relevantas per il sistem" ha la regenza concedì a la vischnanca da Laax ina contribuziun chantunala da maximalmain 1 milliun francs per construir il "wellnessHostel3000 & Aua Grava Laax". Per quest intent ha ella deliberà ina contribuziun chantunala da var 464 000 francs sco prestaziun equivalenta a l'emprest federal (2 milliuns francs) en il rom da la nova politica regiunala (NPR). Il project cumpiglia la construcziun d'in nov hostel che vegn manà da la fundaziun svizra per il turissem social (albierts da giuventetgna svizzers) e che cuntegna in bogn cuvert ed in sectur da wellness. La nova purschida da pernottaziun vegn ad avair passa 160 letgs. Suenter la midada resta l'Aua Grava in bogn cuvert accessibel publicamain.
Il project correspunda a la strategia regiunala per il svilup da l'economia locala da la regiun Surselva e vegn realisà da la vischnanca da Laax sco patruna da construcziun. La gestiun dal hostel da wellness duai generar var 27 000 pernottaziuns supplementaras per onn. Dal nov segment da clientella profiteschan las telefericas, la gastronomia ed il commerzi en detagl da tut la regiun. Pervia da sia vischinanza a differentas purschidas da temp liber cumplettescha il hostel la purschida turistica totala da la destinaziun. La radunanza communala ha prendì tut en tut trais conclus davart quest project e deliberà in credit global da 17,3 milliuns francs.

Visualisaziun2 / Visualisaziun3 ©SSA Architekten

Instrucziun da rumantsch a Domat da nov er sin il stgalim secundar I
La regenza ha concedì al purtader da scola da Domat la permissiun da realisar l'instrucziun da rumantsch sco er l'instrucziun bilingua tudestg/rumantsch sin il stgalim secundar I a partir da l'onn da scola 2019/20. Dapi l'onn da scola 2013/14 vegn mintgamai ina classa da la scolina e da la scola primara manada en moda bilingua. A partir da l'onn da scola 2019/20 vegn ussa realisada l'instrucziun da rumantsch er sin il stgalim secundar I cun il rom d'elecziun "rumantsch" (3. lingua estra) sco er sco part dal champ "individualisaziun" (3. classa dal stgalim secundar I). L'instrucziun bilingua tudestg/rumantsch vegn realisada en il rom "spazis, temps e societads (geografia ed istorgia)" en la 1. e 2. classa dal stgalim secundar I en il senn d'ina immersiun parziala. En l'instrucziun d'immersiun stat en il center il rom correspundent (geografia, istorgia). La segunda lingua chantunala (rumantsch) serva sco lingua da mintgadi e d'instrucziun, n'è però betg l'object da l'instrucziun. Cuntrari a l'immersiun cumpletta vegn instruida en l'immersiun parziala mo ina part dal temp d'instrucziun en la lingua estra.

La regenza beneventa l'aboliziun dals dazis d'industria
La regenza ha prendì posiziun tar il project da revisiun da la confederaziun concernent l'aboliziun dals dazis d'industria. Tenor la proposta dal departament federal d'economia, furmaziun e retschertga duain ils dazis sin imports da rauba d'industria vegnir abolids unilateralmain per facilitar l'import da questa rauba. La regenza grischuna sustegna cumplainamain l'aboliziun proponida dals dazis d'industria sco er la simplificaziun da la structura da las tariffas da dazi. La Svizra mussà uschia ch'ella veglia rinforzar il commerzi liber. Grazia a l'aboliziun da barrieras commerzialas vegn rinforzada la cumpetitivitad da las interpresas grischunas. Dapli imports promovan la concurrenza ed han ina influenza positiva sin la productivitad e sin la forza innovativa da las interpresas. Ultra da las interpresas (en spezial interpresas pitschnas e mesaunas) profiteschan er las consumentas ed ils consuments da pretschs pli bass.

Consultaziuns dal departament federal d'economia, furmaziun e retschertga

Gremi: regenza
Funtauna: rg chanzlia chantunala dal Grischun