Il chantun Grischun porscha a las vischnancas in agid per concepir las fermadas da bus tenor ils basegns da las persunas cun impediments. Plinavant ha la regenza dà glisch verda per abitaziuns da vacanzas explotadas a Scuol ed a Tarasp.

Nov agid da lavur e da calculaziun per las vischnancas per adattar las fermadas da bus
La lescha federala davart l'eliminaziun dals dischavantatgs envers persunas cun impediments (lescha davart l'egualitad da persunas cun impediments, LImp) pretenda ch'ils dischavantatgs per persunas cun impediments vegnian impedids, reducids u eliminads. Ina fermada da bus vala sco fermada senza barrieras, sche las persunas cun impediments pon da princip far diever dal traffic public en moda autonoma e senza l'obligaziun da s'annunziar ordavant. Il termin per adattar edifizis e stabiliments existents scada ils 31 da december 2023. Per concepir las fermadas da bus tenor ils basegns da las persunas cun impediments èn responsablas en il chantun Grischun las vischnancas. En cas da projects per adattar fermadas e per construir fermadas novas èn dentant er involvids differents uffizis chantunals.
Cun sustegn extern ha il departament da construcziun, traffic e selvicultura laschà elavurar in agid da lavur e da calculaziun per questa chaussa. L'agid da lavur duai sustegnair la moda da proceder da las vischnancas en connex cun la concepziun da fermadas da bus tenor ils basegns da las persunas cun impediments. L'agid da lavur cuntegna en spezial ina recumandaziun a las vischnancas – sco patrunas da construcziun – per eruir a maun d'ina examinaziun da la proporziunalitad il basegn d'adattaziun da fermadas da bus. La proporziunalitad po vegnir examinada a maun d'in tool d'Excel (agid da calculaziun) che vegn mess a disposiziun.
En il chantun Grischun datti var 1400 fermadas cun tut en tut passa 2800 urs da perruns. Per promover las adattaziuns architectonicas tar las vischnancas, duai il chantun examinar durant in temp limità in impuls finanzial pli ferm. Las vischnancas vegnan supplitgadas da communitgar al chantun fin la fin da zercladur 2019 lur program d'adattaziun da las fermadas da bus respectivamain il dumber da fermadas da bus ch'èn d'adattar sin lur territori communal. Lura po il chantun stimar pli exactamain ils meds finanzials necessaris.

Agid da lavur e da calculaziun da l'uffizi d'energia e da traffic

Glisch verda per abitaziuns da vacanzas explotadas a Scuol ed a Tarasp
La regenza ha approvà la revisiun parziala da la planisaziun locala che la vischnanca da Scuol aveva concludì ils 10 da zercladur 2018. Tras questa revisiun vegnan stgaffidas las premissas per realisar interpresas d'alloschament cun abitaziuns explotadas turisticamain en las zonas d'hotel da Scuol e da Tarasp sco er en la zona da construcziun Nairs. En las leschas da construcziun da Scuol e da Tarasp vegnan midadas per quest intent las regulaziuns davart las zonas d'hotel e davart la zona da construcziun Nairs. Ellas ston vegnir adattadas a la nova legislaziun federala davart las abitaziuns secundaras. Plinavant è planisada ina midada d'utilisaziun per l'hotel Schweizerhof a Tarasp. La halla da tennis che appartegna a l'hotel duai vegnir duvrada da nov sco halla da parcar. Sin il plan da zonas vegn perquai la zona d'hotel existenta attribuida ad ina zona da parcadi, e sin il plan general da furmaziun vegn abolida l'inscripziun "Sectur da sport, halla".

hotel Schweizerhof a Tarasp ©Comet Photoshopping ScRL / Dieter Enz

Approvaziun da la part forestala da la meglieraziun generala da St. Peter-Pagig/Peist
Il project "Meglieraziun generala St. Peter-Pagig/Peist, extensiun Pagig, part forestala, 1. etappa" da la vischnanca d'Arosa è vegnì approvà da la regenza cun intginas cundiziuns. Plinavant ha la regenza concedì ina contribuziun chantunala da maximalmain 669 500 francs. La part agricula dal project aveva il departament d'economia publica e fatgs socials approvà cun la decisiun dals 12 da mars 2019. La part forestala dal project cumpiglia la construcziun da las duas novas vias da guaud Spina – Gazols e Sulsch – Tiejis, che han mintgamai ina lunghezza da 470 meters. La via da guaud Spina – Gazols sa sparta a Matroz da la via da Triemel e finescha a l'ur marcant da la spunda en il guaud da Gazols. Ella vegn schlargiada ad ina ladezza da 3,2 meters. Plinavant vegn endrizzada ina plazza per installar la crana a cabel. La via da guaud Sulsch – Tiejis sa sparta a Sulsch da la via da Triemel e finescha suenter la traversada dal Grosstobel. La via vegn schlargiada ad ina ladezza da 3 m e survegn ina cuvrida d'asfalt.


Gremi: regenza
Funtauna: rg chanzlia chantunala dal Grischun