La regenza ha deliberà il sboz d’ina nova lescha chantunala davart gieus per daners per la consultaziun. Cun questa nova lescha duai vegnir adattà il dretg da gieus per daners dal Grischun a las prescripziuns federalas.

Sin plaun federal è il dretg da gieus per daners normà da nov en in'unica lescha. Quest nov urden vegn accumpagnà da varsaquantas novaziuns dal cuntegn.

Novaziuns en il chantun Grischun
Questas midadas sin plaun federal chaschunan ina revisiun totala dal dretg da gieus per daners chantunal. L’adattaziun dal dretg da gieus per daners interchantunal n’è betg l’object dal project qua avant maun. En ina nova lescha davart gieus per daners dal chantun Grischun duain vegnir regladas l'admissibladad, la realisaziun e la surveglianza da gieus per daners, las mesiras chantunalas per cumbatter cunter ils gieus per daners excessivs e la taxaziun dals casinos, uschenavant ch'il dretg federal admetta regulaziuns chantunalas.

Ils documents da consultaziun pon ussa vegnir consultads
La lescha duai entrar en vigur – ensemen cun las novas cunvegnas interchantunalas concernent il dretg da gieus per daners – per il 1. da schaner 2021. La consultaziun dura dal 1. d'avrigl 2019 fin ils 30 da zercladur 2019. Ils documents respectivs pon vegnir consultads en l'internet sut www.gr.ch Rumantsch > Publicaziuns > Consultaziuns. Ultra da quai pon els vegnir empustads per telefon (tel. 081 257 25 16) tar il departamentda da giustia, segirezza e sanadad.


Infurmaziuns:
cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch


Gremi: regenza
Funtauna: rg Departament da giustia, segirezza e sanadad