Schefs da regenzas dal territori alpin èn sa scuntrads oz en Baviera ad ina conferenza davart il tema central da la protecziun dal clima.

Il primminister bavarais Markus Söder ha beneventà oz tschintg schefs da regenzas dal territori alpin a Herrenchiemsee. Per il chantun Grischun ha il cusseglier guvernativ Christian Rathgeb fatg il viadi en Baviera. El represchenta ils interess dal Grischun er en la cuminanza da lavur da las regiuns alpinas (ARGE ALP). Ultra da quai èn sa participads a la conferenza il cusseglier guvernativ da Son Gagl Marc Mächler, il guvernatur dal Tirol dal sid Arno Kompatscher, il viceguvernatur dal Tirol Josef Geisler, la presidenta dal parlament da Salzburg Brigitta Pallauf ed il guvernatur dad Oberösterreich Thomas Stelzer.

Incumbensas centralas en il territori alpin
Il tema central da la conferenza è stada la protecziun dal clima per mantegnair la regiun alpina sco spazi da viver, sco lieu economic, sco spazi natiral e sco territori da recreaziun. En quest connex sa tracti da las differentas sfidas per far frunt a la midada dal clima, d'adattaziuns ch'èn necessarias per proteger ils umans e la natira sco er d'ina collavuraziun pli intensiva per sustegnair la perscrutaziun dal clima.

Decleraziun cuminaivla
La scheffa ed ils schefs da las regenzas han suttascrit ina decleraziun cuminaivla per s'exprimer a favur d'ina collavuraziun regiunala intensiva. Plinavant pretendan ella ed els da garantir en il rom da las tractativas actualas davart il preventiv da la UE 2021 fin 2027, che tut las regiuns possian profitar er en l'avegnir en ina dimensiun adequata dals daners da promoziun da la UE.

Decleraziun dal dialog alpin (PDF)


Fotografia:

©Chanzlia statala da la Baviera
Da sanestra: Il viceguvernatur dal Tirol Josef Geisler, il cusseglier guvernativ dal Grischun Christian Rathgeb, il guvernatur dal Tirol dal sid Arno Kompatscher, la presidenta dal parlament da Salzburg Brigitta Pallauf, il primminister da la Baviera Markus Söder, il guvernatur dad Oberösterreich Thomas Stelzer, il cusseglier guvernativ da Son Gagl Marc Mächler, ed il minister dal stadi da la Baviera Florian Herrmann.

©Chanzlia statala da la Baviera


Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas