L'ambassadura svizra en l'Italia, Rita Adam, ha visità – sin invitaziun da la regenza – il chantun Grischun. Il discurs da lavur è stà l'occasiun per dilucidar differents giavischs transcunfinals dal chantun Grischun.
L'ambassadura svizra Rita Adam è vegnida beneventada en la chasa grischa a Cuira da l'entira regenza e dal chancelier. Dapi il cumenzament da l'onn 2018 defenda l'ambassadura Rita Adam ils interess da la confederaziun svizra a Roma.
Traffic e politica da sanadad
En il discurs da lavur èn vegnids tractads differents giavischs actuals dal chantun pertutgant la collavuraziun transcunfinala cun l'Italia, particularmain cun la regiun Lumbardia e cun la provinza autonoma da Bulsaun-Tirol dal sid. Tematisads èn vegnids cunzunt il svilup dal traffic public regiunal e transcunfinal en las vals dal sid sco er differentas dumondas davart la transmissiun d'electricitad suror ils cunfins. Discutadas è vegnidas plinavant la situaziun da traffic en la Val Puschlav sco er la collavuraziun pertutgant ils fatgs da sanadad en la Val Müstair ed en l'Engiadin'ota.
Sfidas cuminaivlas
Il dialog cun l'ambassadura Rita Adam è plinavant stà l'occasiun per discurrer davart l'impurtanza da las mesiras accumpagnantas en il rom da la Cunvegna tranter la Confederaziun svizra e la UE davart la libra circulaziun da persunas. Er ils svilups dal program d'interreg "Italia – Svizra" cun las sfidas da la proxima perioda da program èn stads in element dals discurs. La scuntrada è vegnida cumplettada cun in gentar cuminaivel.
Fotografia:
Da sanestra: cusseglier guvernativ Marcus Caduff, cusseglier guvernativ Christian Rathgeb, ambassadura Rita Adam, president da la regenza Jon Domenic Parolini, cusseglier guvernativ Mario Cavigelli, cusseglier guvernativ Peter Peyer e chancelier Daniel Spadin.
Infurmaziuns:
president da la regenza dr. Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 01, e-mail
Jondomenic.Parolini@ekud.gr.ch
Gremi: regenza
Funtauna: rg chanzlia chantunala