La regenza ha approvà la nova vopna da la vischnanca da Grono ed ha incumbensà l'uffizi da sanadad da realisar l'acziun "bike to work 2019".

Nova vopna per la vischnanca da Grono
La regenza ha approvà la vopna da la nova vischnanca da Grono e l'ha declerada sco ses emblem da suveranitad uffizial. En il contract da fusiun dals 29 da november 2015 han las anteriuras vischnancas da Grono, Leggia e Verdabbio concludì da duvrar provisoricamain la vopna da Grono cun la cundiziun da crear ina nova vopna entaifer in onn suenter la fusiun. Sin quai ha la vischnanca organisà ina concurrenza publica per crear ina nova vopna. Ils 10 da favrer 2019 èn las duas meglras propostas vegnidas suttamessas a la radunanza communala da Grono per la votaziun. La vischnanca è sa decidida per il sboz "legame armonico", per rumantsch "colliaziun armonica".
Ils trais fegls d'iva cun ils monis entretschads punctueschan la stretga colliaziun da las trais vischnancas fusiunadas e simboliseschan la viticultura ch'è impurtanta per las vischnancas. Las tincturas (colurs) correspundan a talas da las anteriuras vopnas da Grono, Leggia e Verdabbio e regordan il medem mument a quels da Sax-Mesauc che han dominà ina giada la vallada.

L'administraziun chantunala sa participescha a l'acziun "bike to work 2019"
L'administraziun chantunala sa participescha l'onn 2019 danovamain a l'acziun "bike to work" da la Pro velo Svizra. La regenza ha surdà l'organisaziun a l'uffizi da sanadad. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun da traffic public e velo. Dapi l'onn 2010 è l'administraziun chantunala dal Grischun sa participada mintga onn a questa acziun. L'onn 2019 è quai pia la 10avla participaziun. Il dumber da participantas e participants e las distanzas percurridas èn s'augmentads cuntinuadamain onn per onn: il 2018 han 430 emploiadas ed emploiads chantunals fatg ensemen totalmain 69 490 kilometers – en media 162 kilometers per persuna. Sin Facebook e sin Instagram mussa l'administraziun regularmain puncts culminants da l'acziun.


Gremi: regenza
Funtauna: rg chanzlia chantunala dal Grischun