La regenza ha deliberà la revisiun totala dal contract normal da lavur per l'economia da chasa per l'audiziun. Ultra da quai ha ella prendì enconuschientscha dal fatg che incumbensas da controlla per stabiliments d'infrastructura da l'aviatica civila en il sectur da l'ambient vegnan surdadas da la confederaziun al chantun Grischun.

La revisiun totala dal contract normal da lavur per l'economia da chasa è vegnida deliberada per l'audiziun
La regenza ha deliberà la revisiun totala dal contract normal da lavur per l'economia da chasa per l'audiziun. Il motiv per questa revisiun è la situaziun da lavur d'uschenumnadas "migrantas circularas", er numnadas "migrantas da tgira" u "live-ins", che derivan da pajais da l'Europa da l'ost. Questas lavurantas vegnan savens per 2 fin 4 emnas en Svizra per furnir prestaziuns da tegnairchasa u prestaziuns d'agid e d'assistenza per ina persuna attempada en ses dachasa. Per regla vivan questas lavurantas ensemen cun la persuna assistida en la medema chasada ed èn pervia da questa vischinanza savens disponiblas durant 24 uras al di per far differentas lavurs da tegnairchasa sco cuschinar, far cumissiuns e nettegiar. Tras la revisiun duain vegnir reglads ils temps da lavur ed ils temps da paus sco er la salarisaziun dals temps da preschientscha (disponibladad sin clom). Da quai ston vegnir cunfinadas cleramain prestaziuns da tgira: quellas èn suttamessas ad autras reglas.
Las relaziuns da lavur en l'economia da chasa na suttastattan betg a la lescha federala da lavur, mabain vegnan regladas en contracts normals da lavur chantunals. Tenor il dretg d'obligaziuns sto il contract normal da lavur vegnir publitgà avant ch'el vegn relaschà. Quai cun fixar in termin, entaifer il qual mintgin che po far valair vardaivlamain in interess, po prender posiziun en scrit en chaussa. Ultra da quai vegnan tadladas federaziuns professiunalas ed uniuns d'utilitad publica interessadas. Correspundentamain vegnan mo federaziuns u uniuns spezialas envidadas directamain da prender posiziun, entant che autras ston far valair in interess per pudair prender posiziun. L'audiziun dura fin ils 31 da fanadur 2019.

Documents d'audiziun tar la revisiun totala dal contract normal da lavur per l'economia da chasa


Il chantun surpiglia incumbensas da controlla per plazzas aviaticas en il sectur da l'ambient
La regenza ha prendì enconuschientscha dal fatg che incumbensas da controlla en il sectur da l'ambient per stabiliments d'infrastructura da l'aviatica civila vegnan surdadas da la confederaziun al chantun Grischun.
L'uffizi federal d'aviatica civila (UFAC) ha proponì da delegar al chantun Grischun las controllas da las plazzas aviaticas grischunas tant durant la fasa da construcziun sco er durant la fasa da manaschi. Il chantun vegn represchentà tras l'uffizi per la natira e l'ambient sco post da coordinaziun e sco partenari da contract. L'incumbensa è quella da garantir che las controllas dals differents posts spezialisads cumpetents en il sectur da l'ambient vegnian fatgas en moda coordinada. L'object da la cunvegna èn mo las plazzas aviaticas ed ils implants da controlla dal traffic aviatic, betg dentant las plazzas per atterraments externs u per atterraments da muntogna. En il Grischun existan las plazzas aviaticas Samedan, San Murezzan, San Vittore, Tavanasa e Vaz sut sco er ils implants da controlla dal traffic aviatic al Corvatsch ed al Lucmagn.

Gremi: regenza
Funtauna: rg chanzlia chantunala dal Grischun