Ils 23 da fanadur 2019 ha il chantun Grischun sia preschentaziun a la festa tradiziunala da vendemia a Vevey. Il di grischun a la Fête des Vignerons stat sut il motto "Giudiment dal Grischun" e vegn enramà da differentas preschentaziuns da furmaziuns grischunas e d'artistas ed artists grischuns.

La Fête des Vignerons ha lieu mo mintga 20 fin 25 onns a Vevey e fa part dal patrimoni cultural immaterial da la UNESCO. Dals 18 da fanadur fin ils 11 d'avust 2019 èsi puspè uschè lunsch. Il Grischun sco chantun ospitant profita da l'occasiun da sa preschentar ils 23 da fanadur 2019 cun sia multifariadad culturala, linguistica e culinarica. Ultra dal motto "Giudiment dal Grischun" simbolisescha questa cumparsa er ina punt tranter las linguas neolatinas da la Svizra.

Program attractiv
Il program cultural mussa – cun ina bella maschaida da las linguas chantunalas e cun differentas direcziuns da stil – il chantun Grischun tranter tradiziun e temp modern. L'arriv da la gruppa da sauma a Vevey, che parta in'emna avant a Mustér e che transporta products grischuns en sia bagascha, fa ina punt culinarica tranter la festa dals senns da graubündenVIVA ed il di grischun a la Fête des Vignerons. Natiralmain na dastgan er betg mancar vins grischuns ad ina festa da vendemia. Viticulturas e viticulturs grischuns preschentan a Vevey lur buns daguts che pon vegnir degustads al lieu.

Delegaziun prominenta
La delegaziun grischuna da var 100 persunas che consista da represchentantas e represchentants e da giasts dals partenaris da project Grischun vacanzas, graubündenWEIN, alpinavera e graubündenVIVA vegn manada da la conferenza da las presidentas e dals presidents dal cussegl grond, d'ina represchentanza da la regenza sco er da parlamentarias e parlamentaris federals.

Festa populara cun ina lunga tradiziun
Gia l'onn 1797 èn s'unids possessurs da vignas dal Vad per premiar publicamain lur meglier viticultur. Dapi il 19. tschientaner è la festa da viticulturs a Vevey ina gronda festa populara. Sin ina tribuna al liber preschentan var 5500 acturas ed acturs in toc da teater ch'è vegnì producì da poetessas e poets, da musicistas e musicists sco er da choreografas e choreografs. Per las totalmain 23 represchentaziuns vegnan mintgamai spetgads 20 000 aspectaturas ed aspectaturs en l'arena. Parallelamain ha lieu ina festa da la citad che vegn ad attrair mintga di ulteriuras 20 000 visitadras e visitaders.

Fotografia:

©Fête des Vignerons

Agiuntas:
- glista da las artistas e dals artists grischuns
- program


Infurmaziuns:
- cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch
- Bruno Caduff, manader da project, departament d'economia publica e fatgs socials, tel. 081 257 23 13, e-mail Bruno.Caduff@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials