La "WAVE" (world advanced vehicle expedition) sa ferma glindesdi, ils 17 da zercladur 2019, en il Grischun. Cun questa rallye da vehichels electrics duai vegnir demonstrà che la mobilitad electrica è ina moda da mobilitad netta ed adattada per il mintgadi. In film nov da la chanzlia chantunala mussa il stadi da la mobilitad electrica en il Grischun.

La "WAVE" celebrescha sia 10avla ediziun cun in tur tras la Svizra. Dals 14 fin ils 22 da zercladur 2019 maina la rallye d'autos electrics la pli gronda dal mund che ha lieu mintga onn, tras tut ils 26 chantuns da la Svizra. 1600 kilometers ston vegnir dumagnads. En il Grischun sa ferma la WAVE ils 17 da zercladur 2019 a Cuira ed a Flem. Aspectaturas ed aspectaturs interessads èn bainvegnids cordialmain a questas occurrenzas. Als dus lieus d'etappa èsi pussaivel da vegnir a savair dapli da la mobilitad electrica sco er da contemplar ils vehichels da damanaivel.

Program multifar en il Grischun
A las 13.45 cuntanschan ils emprims vehichels il Alexanderplatz a Cuira. Suenter in event da scola cun partenza a las 14.00 suonda a las 14.45 il bainvegni uffizial tras il cusseglier guvernativ Mario Cavigelli e tras il president da la citad Urs Marti. Las emprimas manischunzas ed ils emprims manischunzs cuntinueschan alura lur cursa a las 16.30 per arrivar a las 17.00 a Flem sco lieu final da questa etappa. Il bainvegni uffizial ed ina tschaina cumpletteschan il di grischun. Avant che cuntinuar il di suenter cun lur tur en il Tessin preschentan las manischunzas ed ils manischunzs lur vehichels electrics a las scolaras ed als scolars da Flem.

"WAVE": promover l'electromobilitad
Var 60 vehichels, tranter quels er velos electrics e motos electricas, sa participeschan quest onn a la rallye. Ultra dal pocal da la victoria vulan las e-mobilistas ed ils e-mobilists cuntanscher oravant tut ina finamira: ellas ed els vulan mussar che la mobilitad electrica è ina moda da mobilitad netta ed adattada per il mintgadi ed uschia ina soluziun raschunaivla per noss avegnir. Pervia da quai datti en la gronda part dals 40 lieus frequentads da la rallye da vehichels electrics scuntradas d'infurmaziun cun autoritads, cun scolas e cun la populaziun. Ultra da quai ston las manischunzas ed ils manischunzs garantir che l'energia consumada durant la "WAVE" vegn introducida en la rait or d'energia solara. La "WAVE"-trophy è vegnida etablida sco incumbensa da la ONU a Louis Palmer che ha circumdà avant 10 onns sco emprim uman il mund en in vehichel solar.

Ulteriuras infurmaziuns: https://wavetrophy.com/wave/switzerland-2019/


Infurmaziuns:
Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch


Gremi: uffizi d'energia e da traffic
Funtauna: rg uffizi d'energia e da traffic