Il nov rapport da sanadad dal chantun Grischun dat ina invista cumplessiva da la situaziun da sanadad da la populaziun grischuna.

Dapi l'onn 1992 realisescha l'uffizi federal da statistica (UST) mintga 5 onns l'enquista svizra davart la sanadad. Il chantun Grischun ha incumbensà l'observatori svizzer da sanadad (Obsan) d'evaluar l'ultima enquista, ch'è vegnida fatga l'onn 2017, specificamain per il chantun Grischun. Il rapport cuntegna en spezial infurmaziuns davart il stadi da sanadad da la populaziun, davart il diever da prestaziuns da sanadad sco er davart ils custs e las premias da l'assicuranza obligatorica per la tgira da persunas malsaunas.

Percepir il tema "sanadad" en moda pli sapientiva
Il rapport da sanadad sa drizza tant a represchentantas e represchentants da la politica e dals fatgs da sanadad sco er a tut las abitantas ed a tut ils abitants interessads dal chantun. D'ina vart duai il rapport svegliar ina discussiun sapientiva davart il tema "sanadad" e sensibilisar la populaziun grischuna per la valur d'in bun provediment da la sanadad, ma er per l'impurtanza d'in cumportament che promova la sanadad. Da l'autra vart serva el als posts cumpetents sco basa per realisar mesiras che promovan la sanadad, ch'èn preventivas e curativas.


Agiunta: 
Rapport da sanadad dal chantun Grischun


Infurmaziuns:
cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad