La cumissiun dal cussegl grond per economia e taxas (CET) ha predeliberà la missiva da la regenza tar la revisiun parziala da la lescha da taglia per il chantun Grischun (realisaziun da la RFFA). La cumissiun è entrada unanimamain en il project. Tar la concepziun dal cuntegn divergiavan las opiniuns dentant.

Sut la direcziun dal president da la cumissiun Reto Loepfe è la missiva vegnida predeliberada en duas lecturas. A tuttas duas sesidas èn er sa participads il cusseglier guvernativ Christian Rathgeb, schef dal departament da finanzas e vischnancas, e represchentants da l'administraziun. Il project stat sut pressiun da temp, perquai ch'ils chantuns ston realisar la lescha federala davart la refurma fiscala e la finanziaziun da la AVS (RFFA) fin il 1. da schaner 2020. La CET è entrada unanimamain en il project.

Adattaziuns da la politica d'economia
Tenor la missiva duai la taglia sin il gudogn da persunas giuridicas vegnir sbassada dad actualmain 5,5 pertschient a 4 pertschient. Questa opiniun vegn sustegnida d'ina maioritad da la cumissiun. In'emprima minoritad pleda per in sbassament pli pitschen sin 4,5 pertschient, entant ch'ina segunda minoritad refusa dal tuttafatg il sbassament e fa la proposta da mantegnair la tariffa actuala da 5,5 pertschient. In segund punct è stada l'imposiziun da taglia sin patentas e sin dretgs cumparegliabels. Qua propona la maioritad da la cumissiun ina reducziun da 90 pertschient per la lavur da perscrutaziun e da svilup, entant ch'ina minoritad sustegna la regenza cun 70 pertschient. En in terz punct – quel areguard la distgargia maximala – è l'opiniun da la cumissiun sa separada: la maioritad da la cumissiun sustegna la proposta da la regenza cun 55 pertschient, in'emprima minoritad vul auzar la distgargia a 60 pertschient ed ina segunda minoritad vul sbassar tala a 33 pertschient.

Gulivaziun sociala
Ina gronda discussiun hai dà en la cumissiun er pervia da las mesiras da distgargia per las persunas natiralas che vegnan pretendidas da tuttas varts en connex cun la realisaziun da la RFFA. La proposta da la regenza che prevesa in augment da la pauschala per ils custs da professiun vegn però refusada cleramain da la cumissiun. La maioritad da la cumissiun vul percunter auzar l'import liber da taglia da 15 000 francs sin 16 000 francs e la minoritad da la cumissiun propona d'augmentar las deducziuns per las contribuziuns a favur d'assicuranzas socialas, e quai per distgargiar las persunas natiralas.

La balla è ussa tar il cussegl grond che vegn a sa fatschentar cun questas propostas e pretensiuns. Per quai sa prenda el il temp durant la sessiun d'avust 2019.


Infurmaziuns:
president da la cumissiun Reto Loepfe, tel. 079 620 09 30


Gremi: cumissiun per economia e taxas
Funtauna: rg cumissiun per economia e taxas