Ils 31 da december 2018 vivevan en il chantun Grischun permanentamain 198 379 abitants, 491 dapli che l'onn precedent. La populaziun s'augmenta vinavant sut la media.

Cun 0,25 pertschient è la populaziun grischuna s'augmentada l'onn 2018 mo pauc pli ferm che l'onn precedent. In augment pli pitschen ch'il Grischun han mussà l'onn passà mo ils chantuns Giura, Glaruna ed Appenzell Dador. Plinavant è diminuida levamain la populaziun dals chantuns Tessin e Neuchâtel. En l'entira Svizra è s'augmentada la populaziun permanenta l'onn 2018 per 0,7 pertschient ad 8 544 527 persunas.

Different svilup tranter las regiuns
Quasi la mesadad da l'augment absolut da la populaziun en il Grischun pertutga la regiun Plessur; ensemen cun las regiuns Landquart e Plaun sa concentrescha l'augment da la populaziun vinavant cunzunt sin la part nord dal Grischun. La populaziun è dentant er s'augmentada levamain en las regiuns Viamala e Moesa, entant che l'Engiadina auta e bassa sco er la regiun Bernina han pers populaziun.

Funtauna: uffizi federal da statistica (STATPOP)
Populaziun permanenta da las regiuns grischunas: midadas procentualas 2018 e populaziun per ils 31 da december 2018

La citad da Cuira quintava la fin da l'onn 2018 35 378 abitants permanents, 340 dapli che avant in onn. Circa la mesadad da la populaziun grischuna viva en il fratemp en vischnancas che han passa 3000 abitants. En las 21 vischnancas las pli pitschnas cun main che 250 abitants è domicilià anc in pertschient da la populaziun. 

Funtauna: uffizi federal da statistica (STATPOP) 
Structura d'abitants da las vischnancas grischunas per ils 31 da december 2018

Augment exclusivamain pervia da l'immigraziun internaziunala
1794 naschientschas han fatg frunt l'onn passà a tut en tut 1789 mortoris. Il saldo da las naschientschas, la differenza tranter il dumber da las naschientschas e dals mortoris, da la populaziun svizra è cleramain negativ cun in minus da 284, quel da la populaziun estra – en media pli giuvna – positiv cun in plus da 289.

Perquai ch'er l'onn passà èn emigradas dapli persunas davent dal Grischun en auters chantuns che viceversa, sa basa l'augment positiv da la populaziun ina giada dapli praticamain mo sin l'immigraziun internaziunala; 3542 persunas immigradas da l'exteriur s'opponan a 2811 persunas emigradas. 544 abitants dal Grischun han survegnì l'onn 2018 il dretg da burgais svizzer.

Stgars 37 000 burgais esters
Per la fin da l'onn 2018 cumpiglia il Grischun tut en tut 36 982 abitants permanents da mo naziunalitad estra. Senza midadas derivan las pli bleras persunas dal Portugal, numnadamain 9238 persunas, las suandantas gruppas las pli grondas furman burgais tudestgs, 7426 persunas, e talians, 6601 persunas. Tut en tut vivan en il chantun Grischun abitants da 135 differents stadis.

Ils detagls davart la populaziun e davart ils svilups demografics da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'uffizi per economia e turissem (guardar Statistik und Register).


Infurmaziuns:
Patrick Casanova, manader da la partiziun "statistica e registers", tel. 081 257 23 74, e-mail Patrick.Casanova@awt.gr.ch


Gremi: uffizi per economia e turissem dal Grischun
Funtauna: rg uffizi per economia e turissem dal Grischun