La regenza ha approvà ina midada da zona a Puntraschigna e cun quai dà glisch verda per in project d'hotel planisà. Ultra da quai ha ella adattà disposiziuns davart il sport da muntogna e da naiv.

Glisch verda per in project d'hotel a Puntraschigna
La regenza ha approvà ina revisiun parziala da la planisaziun locala che la vischnanca da Puntraschigna aveva concludì ils 13 da mars 2019. Uschia vegnan stgaffidas las premissas per realisar in project d'hotel modern d'auta qualitad al lieu da l'hotel Posta existent. I n'è betg planisà d'engrondir la zona da construcziun. Anzi, i sa tracta da midar ina zona da construcziun en vigur e gia surbajegiada (zona d'hotel) en in'autra zona da construcziun (zona d'hotel Posta). Cun questa midada da zona po la parcella vegnir surbajegiada en moda pli spessa, uschia che la zona da construcziun existenta po vegnir duvrada cun dapli mesira. Plinavant vegnan observadas las prescripziuns architectonicas impurtantas da l'architectura locala per il territori pertutgà.

©Comet Photoshopping ScRL / Dieter Enz

La regenza ha adattà disposiziuns davart il sport da muntogna e da naiv
La regenza ha approvà ina revisiun parziala da las disposiziuns executivas tar la lescha davart il sport da muntogna e da naiv. La lescha federala e l'ordinaziun respectiva davart ils guids da muntogna e la purschida d'ulteriuras activitads da ristga reglan tschertas activitads en il liber resp. da ristga che vegnan purschidas professiunalmain en muntogna, en territori grippus sco er en auals e flums. La revisiun totala da l'ordinaziun federala è entrada en vigur il 1. da matg 2019. Pervia da quai ston ussa vegnir adattadas las disposiziuns executivas sin plaun chantunal. Questa revisiun entra en vigur il 1. d'october 2019.


Gremi: regenza
Funtauna: rg chanzlia chantunala dal Grischun