La regenza ha approvà il plan sectorial chantunal Velo. Las numerusas inoltraziuns durant la consultaziun chantunala èn vegnidas resguardadas sche pussaivel. Il plan sectorial Velo fixescha la rait chantunala da vias da velo e definescha ils criteris per calcular las contribuziuns chantunalas.
La projectaziun, la construcziun ed il mantegniment da vias da velo èn l'incumbensa da las vischnancas. Il chantun sustegna quellas cun contribuziuns chantunalas, sch'ina via da velo è en l'interess dal chantun. Il plan sectorial Velo fixescha ils parameters per determinar questas colliaziuns e questas rutas. Quellas constitueschan la "rait chantunala da vias da velo", repartida en ina rait da vias da velo dal traffic quotidian ed en ina dal traffic da temp liber. La repartiziun a la rait respectiva è tranter auter d'impurtanza per l'autezza da la contribuziun chantunala. Il plan sectorial definescha ils criteris per fixar l'autezza da la contribuziun respectiva. Ina part integrala dal plan sectorial Velo è ultra da quai in plan da la rait da vias da velo sco er ina directiva da projectaziun per il traffic da velo quotidian.
Consultaziun en tut il chantun
La consultaziun en tut il chantun tar in emprim sboz ha chattà in grond interess. 90 inoltraziuns cun 766 remartgas èn vegnidas evaluadas, respundidas e resumadas en in "rapport da cooperaziun tar la consultaziun". Da differentas opiniuns inoltradas è resultada in'adattaziun u ina precisaziun dal cuntegn dal plan sectorial, en spezial dal plan da la rait da vias da velo.
Ils documents stattan a disposiziun online
Il plan sectorial Velo approvà ed il rapport da cooperaziun pon vegnir consultads sin
la pagina d'internet da l'uffizi da construcziun bassa.
Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail
Mario.Cavigelli@bvfd.gr.ch
- Reto Knuchel, inschigner chantunal, uffizi da construcziun bassa, tel. 081 257 37 01, e-mail
Reto.Knuchel@tba.gr.ch
Gremi: regenza
Funtauna: rg departament da construcziun, traffic e selvicultura