La regenza da la provinza autonoma Bulsaun–Tirol dal sid ha visità oz – sin invitaziun da la regenza grischuna – il chantun Grischun. En il rom dal discurs da lavur constructiv a Valendau èn vegnids tractads differents temas transcunfinals.

Avant ils discurs uffizials a Valendau han ils giasts dal Tirol dal sid pudì giudair la vista sin in panorama unic. La fermada tar la plattafurma panoramica Zault en la chavorgia da Versomi cun sia vista grondiusa sin la Ruinaulta è stada in cumenzament inspirant per il discurs da lavur suandant.

Temas multifars
Durant il discurs da lavur è vegnida tematisada tranter auter ina cooperaziun en il sectur cultural tranter las gruppas linguisticas dal ladin da las Dolomitas e dal rumantsch dal Grischun. Per la regenza grischuna è questa scuntrada stada ultra da quai ina buna occasiun per discurrer cun ils vischins dal Tirol dal sid sur da colliaziuns da bus transcunfinalas. Plinavant ha la collavuraziun transcunfinala procurà per in barat interessant en connex cun la chatscha ed il manaschament da la selvaschina.

Program accumpagnant interessant
Suenter il discurs da lavur èn stads sin il program in gentar cuminaivel e la visita da la Hamilton SA a Domat. Là stevan en il center da la visita l'innovaziun sco er ils fatgs d'emprendissadi da l'interpresa grischuna. Las scuntradas da las regenzas dal Tirol dal sid e dal chantun Grischun èn daventadas tradiziun. Dapi 1999 sa scuntran las regenzas regularmain per discurs da lavur.

Fotografias agiuntadas:

Las regenzas da la provinza autonoma Bulsaun–Tirol dal sid e dal chantun Grischun tar la plattafurma panoramica Zault aut sur la Ruinaulta

Il guvernatur Arno Kompatscher ed il president da la regenza Jon Domenic Parolini


Infurmaziuns:
president da la regenza Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 12, e-mail Jondomenic.Parolini@ekud.gr.ch


Gremi: regenza
Funtauna: rg chanzlia chantunala dal Grischun