La scola auta da pedagogia dal Grischun ha survegnì l'incumbensa da publitgar anc ina giada la scolaziun cumplementara a la professiun per il stgalim secundar I. Ultra da quai ha la regenza approvà in project per che la surveglianza ed il preavertiment a Brinzauls possian vegnir cuntinuads.
La nova scolaziun cumplementara a la professiun per il stgalim secundar I a la SAPGR vegn publitgada anc ina giada
La scola auta da pedagogia dal Grischun (SAPGR) vegn incumbensada da realisar, en cooperaziun cun la scola auta da pedagogia da Son Gagl, dal 1. da settember 2020 fin ils 31 d'avust 2023 la scolaziun cumplementara a la professiun sco persuna d'instrucziun per il stgalim secundar I. Questa scolaziun sa drizza a persunas d'instrucziun che instrueschan actualmain sin il stgalim secundar I senza in diplom che correspunda al stgalim u che vulan midar dal stgalim primar al stgalim secundar I.
La SAPGR aveva planisà e publitgà quest studi da master gia per l'onn 2019. La premissa per manar tras la scolaziun è però stada quella che almain 24 persunas dal chantun Grischun s'annunzian. Perquai che quest dumber da participantas e participants n'è betg vegnì cuntanschì, ha la SAPGR decidì – en enclegientscha cun ses partenaris – da desister da la realisaziun dal studi da master che dueva cumenzar l'atun 2019. Ussa duai però – en l'interess d'ina scola populara qualitativamain buna – il studi da master vegnir publitgà anc ina giada e vegnir realisà questa giada independentamain d'in dumber minimal da participantas e participants.
Il project da surveglianza e da preavertiment a Brinzauls vegn cuntinuà
La regenza ha approvà il project "Surveglianza e preavertiment Brinzauls 2019−2024" da la vischnanca d'Alvra. Ultra da quai ha ella deliberà ina contribuziun chantunala da maximalmain 720 000 francs sa basond sin la legislaziun forestala ed in'ulteriura contribuziun da maximalmain 54 000 francs sa basond sin la lescha davart las vias.
A Brinzauls è en gir ina sedimentaziun da grond spazi che chaschuna adina puspè bovas e crudadas da grippa che pericliteschan il vitg sco er la via chantunala. I èn gia vegnids installads plirs sistems da mesiraziun, cun ils quals ils moviments da las massas da grippa han pudì vegnir registrads e survegliads. Ultra da quai è vegnì endrizzà in sistem d'alarm sco er concepì in dispositiv da segirezza. Per survegliar ils moviments e per survegnir infurmaziuns davart periclitaziuns acutas tras eveniments pli gronds duai vegnir cuntinuà cun il sistem da preavertiment existent durant ils onns 2019 fin 2024. Il medem mument duai quel vegnir cumplettà ed engrondì cun novs indrizs, nua che quai è necessari. Per ch'i possian vegnir gudagnadas permanentamain datas fitg precisas davart ils moviments da la costa, er sche la visibilitad n'è betg buna, vegn duvrà in georadar a partir d'immediat.
La via sursilvana a Rueun vegn sanada
Il project per renovar la via sursilvana a Rueun è vegnì approvà da la regenza cun permissiuns spezialas e cun cundiziuns. La via sursilvana è ina part integrala da l'axa ost/vest da la rait federala da vias principalas e furma l'avertura da basa per la Surselva. Sco via da transit serva ella tranter auter a l'avertura dals territoris da skis e da viandar da la Surselva. En il sectur dal vitg da Rueun na correspunda la via betg pli a las pretensiuns dad oz. La surstructura da la via e la punt sur il Schmuèr èn en in nausch stadi. Pervia da quai duai la via vegnir renovada ed engrondida. Plinavant èsi previs da remplazzar la punt sur il Schmuèr tras ina construcziun nova. Ultra da quai vegn la vischnanca ad optimar las fermadas da bus ed il traffic betg motorisà appartegnent. Tut en tut custa il project circa 6,54 milliuns francs.
Gremi: regenza
Funtauna: rg chanzlia chantunala dal Grischun