Quest onn ha il president da la regenza manà la regenza en l'Engiadina bassa ed en la Val Müstair. La regenza ha visità il Muzeum Susch sco er il "House to watch the sunset" da Not Vital, è viandada tras il God da Tamangur e sur il Pass da Costainas ed ha la finala visità la claustra Son Jon a Müstair.

Per sia sesida champestra da 2 dis da quest onn è la regenza sa rendida en l'Engiadina bassa ed en la Val Müstair. Accumpagnada dal president communal Emil Müller ha ella visità l'emprim di il Muzeum Susch ch'è vegnì avert il schaner da quest onn. La directura Mareike Dittmer ha manà la regenza tras ils edifizis restaurads e tras las novas construcziuns annexas. A Tarasp ha la regenza visità il "House to watch the sunset" da Not Vital. Quai è la terza chasa da tal gener da l'artist, las duas ulteriuras èn situadas en il Niger ed en Brasilia. Suenter è la regenza vegnida infurmada da Christian Fanzun, il president communal da Scuol, davart las sfidas da la vischnanca cun la surfatscha la pli gronda.

Il segund di èn ils commembers da la regenza ed il chancelier viandads tras il God simbolic da Tamangur en la Val S-charl fin a l'Alp Astras-Tamangur e vinavant sur il Pass da Costainas fin a l'Alp Champatsch en la Val Müstair. Els èn vegnids accumpagnads dad Arno Kirchen, il manader dals manaschis tecnics da Scuol, respectivamain da David Spinnler, il mainagestiun da la Biosfera Val Müstair. Quest ultim ha infurmà la regenza davart il manaschi e davart ils projects dal reservat da biosfera. Sco finiziun è ina visita da la claustra Son Jon a Müstair stada sin il program. La regenza è vegnida beneventada da la priura Domenica Dethomas e manada tras la claustra dad Elke Larcher, la directura dal museum da la claustra.

Fotografia agiuntada:

Infurmaziuns:
president da la regenza Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 12, e-mail Jondomenic.Parolini@ekud.gr.ch

Gremi: regenza
Funtauna: rg chanzlia chantunala