La regenza ha deliberà il sboz tar ina revisiun parziala da la lescha chantunala davart il guaud per la consultaziun. Il project duai cunzunt dar ina basa a l'urden da cumpetenzas en il sectur dal management integral da las ristgas en connex cun ils privels da la natira.
La lescha chantunala davart il guaud è en vigur dapi l'onn 2013. Las regulaziuns legalas èn sa cumprovadas en la pratica. Ma en singuls secturs exista in basegn d'agir respectivamain d'adattaziun. Per l'ina ha il management da privels da la natira survegnì evidentamain dapli impurtanza, uschia che l'urden da cumpetenzas vivì e cumprovà duai vegnir francà pli cleramain en la lescha. Per l'autra vali da realisar las novas prescripziuns dal dretg federal concernent il cumbat cunter organissems nuschaivels. La revisiun parziala permetta la finala d'adattar ulteriuras regulaziuns e da facilitar lur execuziun.
Management integral da las ristgas
La strategia da clima dal chantun Grischun metta ses accent sin il rinforz dal management integral da las ristgas en cas da privels da la natira. Er il program da la regenza 2017-2020 ch'è vegnì elavurà cuminaivlamain da la regenza e dal parlament, cuntegna ina finamira correspundenta. Cun la revisiun parziala da la lescha davart il guaud duain las cumpetenzas vegnir regladas pli cleramain. Il chantun, las vischnancas sco er eventualas terzas varts ch'èn – sin fundament da leschas spezialas – responsabels per la segirezza da las infrastructuras, ston vegnir integrads en l'urden da cumpetenzas.
Adattaziun al dretg federal midà
Per il chantun sco er per terzas varts pertutgadas prevesa il dretg federal midà incumbensas novas u extendidas areguard las mesiras ch'èn da prender cunter ils organissems nuschaivels che pericliteschan considerablamain il mantegniment dals guauds e sias funcziuns. Per pudair garantir ina legislaziun forestala chantunala ch'è confurma al dretg federal èn necessarias adattaziuns en il dretg chantunal.
Execuziun simplifitgada dal scumond da far fieu en cas da privel d'incendis da guaud e da cultira pli grond
L'execuziun dal scumond da far fieu en cas da privel d'incendis da guaud e da cultira pli grond duai vegnir simplifitgada, mantegnend las cumpetenzas fundamentalas dal chantun e da las vischnancas. Las vischnancas pon prevair excepziuns dal scumond da far fieu per fuclars segirs.
La consultaziun dura fin ils 20 da december 2019. Ils documents pon vegnir consultads sut:
https://www.gr.ch/RM/publicaziuns/Consultaziuns/Seiten/Laufende.aspx
Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala