La regenza grischuna ha reelegì Martin Gredig e Fulvio A. Bottoni sco cussegliers da la banca chantunala grischuna per la perioda d'uffizi dal 1. d'avrigl 2020 fin ils 31 da mars 2024.

Tenor la lescha davart la banca chantunala grischuna (BCG) è la regenza cumpetenta per eleger il cussegl da banca che sa cumpona da set persunas. Ils 31 da mars 2020 fineschan las periodas d'uffizi dals cussegliers da banca Martin Gredig e Fulvio A. Bottoni. Ils dus cussegliers èn en il cussegl da banca dapi l'onn 2016. Valair vala ina limitaziun legala dal temp d'uffizi da 12 onns. La regenza grischuna ha reelegì Martin Gredig e Fulvio A. Bottoni sco cussegliers da la banca chantunala grischuna per la perioda d'uffizi dal 1. d'avrigl 2020 fin ils 31 da mars 2024.

Martin Gredig ha 54 onns ed abita a Tumein. El è vegnì reelegì pervia da sia experientscha cumprovada da plirs onns sco expert da finanzas en differentas branschas. Fulvio A. Bottoni da Zizers, che ha 51 onns, è vegnì reelegì pervia da sias enconuschientschas profundas da l'economia da bancas e dal management da las ristgas, ch'el ha acquistà en il rom da sias activitads d'enfin ussa en l'economia privata u sco professer per contabilitad e controlling.

Las elecziuns en il cussegl da banca han lieu resguardond las prescripziuns da l'autoritad federala per la surveglianza dals martgads da finanzas (FINMA) ed il profil d'exigenzas da la regenza per il cussegl da banca.


Fotografias agiuntadas:
- Martin Gredig
- Fulvio A. Bottoni  


Infurmaziuns:
cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch


Gremi: regenza
Funtauna: rg chanzlia chantunala