L'ambassadura britannica, Jane Caroline Owen, ha visità oz – sin invitaziun da la regenza – il chantun Grischun.

Jane Caroline Owen, la pli auta represchentanta da Sia Maiestad britannica en Svizra, è vegnida beneventada oz en il chastè da Haldenstein dal president da la regenza Jon Domenic Parolini e dal chancelier Daniel Spadin. L'ambassadura è vegnida accumpagnada da Henry Evans, head of policy team. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Davant: chancelier Daniel Spadin, Henry Evans, head of policy team
Davos: president da la regenza Dr. Jon Domenic Parolini, ambassadura Jane Caroline Owen

Gremi: regenza
Funtauna: rg chanzlia chantunala dal Grischun