La regenza metta en vigur per il 1. da schaner 2020 la revisiun dal contract normal da lavur (CNL) per l'economia da chasa. Uschia vegn meglierada la situaziun da lavur da las uschenumnadas "migrantas da tgira".
Il motiv per la revisiun dal CNL era la situaziun da lavur d'uschenumnadas "migrantas da tgira" u "live-ins" da pajais da l'Europa da l'ost. Questas lavurantas vegnan savens per 2 fin 4 emnas en Svizra per furnir prestaziuns da tegnairchasa u prestaziuns d'agid e d'assistenza per ina persuna attempada en ses dachasa. Per regla vivan ellas ensemen cun questa persuna en la medema chasada ed èn pervia da questa vischinanza savens disponiblas durant 24 uras al di per far differentas lavurs da tegnairchasa sco cuschinar, far cumissiuns, nettegiar sco er gidar tar la tgira da persunas attempadas e malsaunas.
Tras la revisiun vegnan reglads da nov en spezial ils temps da lavur ed ils temps da paus sco er la salarisaziun dals temps da preschientscha (disponibladad sin clom). Da quai ston vegnir cunfinadas cleramain las prestaziuns da tgira: quellas èn suttamessas ad autras reglas.
La revisiun dal CNL chantunal per l'economia da chasa s'orientescha per gronda part al model-CNL elavurà da la confederaziun per cumplettar ils CNL chantunals per lavurantas e lavurants en il rom d'ina assistenza da 24 uras.
Regulaziun per entradas minimalas che segireschan l'existenza
Per garantir entradas minimalas che segireschan l'existenza vegni pretendì da nov che almain 7 uras per di vegnian quintadas sco uras da lavur, sche la relaziun dal temp da preschientscha e dal temp da lavur prestà effectivamain è sproporziunada. Uschia duai vegnir garantì ch'in salari, che pussibilitescha in'existenza, possia tuttina vegnir obtegnì, sch'il temp da preschientscha è aut ed il temp da lavur effectiv è bass, en spezial, sch'ina autra activitad na po betg vegnir pratitgada pervia da la dimensiun dal temp da preschientscha. Plinavant sto da nov vegnir salarisà il temp da preschientscha. Il temp da preschientscha è quel temp ordaifer il temp da lavur, durant il qual la forza da lavur sto star a disposiziun per acziuns da lavur (disponibladad sin clom).
Plinavant vegna fatgas ulteriuras pitschnas adattaziuns, sco per exempel concernent il supplement da paja per la lavur da notg u concernent l'obligaziun da documentaziun. Il CNL ha caracter dispositiv, quai vul dir ch'el vala mo, sch'i na vegn betg fixada en scrit in'autra regulaziun. Las novas regulaziuns vegnan messas en vigur per il 1. da schaner 2020.
Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch
Funtauna: rg chanzlia chantunala
Gremi: regenza