Cun la midada da l'urari ils 15 da december 2019 survegnan quasi tut las regiuns dal chantun Grischun ulteriuras purschidas da tren e da bus. Per la viafier vegn la purschida extendida il pli fitg sin il traject Landquart – Tavau. Qua resulta – en spezial durant las fins d'emna – in tact da mes'ura quasi nuninterrut. En il sectur dals bus vegnan serradas largias en il tact sin intginas lingias ed extendidas las purschidas durant las uras marginalas.

Viafiers federalas / Thurbo

La perioda da traffic dals trens spezials da sport d'enviern tranter Turitg e Cuira vegn prolungada fin Pasca. Da quai resulta in tact da mes'ura per trens IC durant ils temps principals da viadi da las fins d'emna da la stagiun auta.

Sin la lingia dal ICE Hamburg – Francfurt – Cuira datti novs trens ICE 4 cun cumpartiment per velos, las dumengias arriva in ICE supplementar en il Grischun.

Viafier retica

Tranter Landquart e Tavau datti – en spezial durant las fins d'emna – in ulteriur augment dal tact. La purschida s'avischina uschia al tact da mes'ura. Da glindesdi fin venderdi vegnan introducids trens supplementars tranter Claustra e Tavau durant ils temps principals da traffic. Tranter Rehanau-Tumein e Glion resp. per part gia davent da Cuira circuleschan durant la stagiun da stad trens d'aventura l'entira fin d'emna, quai vul dir da nov er la sonda. Ulteriuras meglieraziuns da l'urari cumpiglian novas colliaziuns da tard (en spezial durant las fins d'emna) sin la lingia da l'Alvra e dal Veraina tranter il Grischun dal nord e l'Engiadina. Per ch'il Puschlav saja collià meglier cun las autras regiuns dal chantun durant las uras marginalas, procuran novs bus da cumpensaziun la damaun e la saira per ina meglra colliaziun.

Extensiun da la purschida da bus

Davent da Tusaun en direcziun da la Mantogna dadens e dadora datti in tact d'ina ura nuninterrut, e la Val Sertig survegn da nov in tact da mes'ura durant la stagiun da stad. Da la Val Mesauc po Cuira vegnir cuntanschì da nov la damaun avant las 8.00, quai grazia ad ina nova colliaziun da baud. Durant la stagiun da stad cursescha mintga di in curs nonstop Cuira – Bellinzona, las butias ad Isla Schluein survegnan da nov ina colliaziun da bus ed Urmagn Sura vegn en l'avegnir er collià durant l'enviern cun il traffic public. La Val Müstair survegn in curs da baud durant l'enviern. Per Laax e per Lai datti durant l'emna ina nova colliaziun da tard cun in bustaxi davent da Cuira. A Claustra circulescha il venderdi e la sonda saira sco er mintga di durant la stagiun d'enviern in bustaxi mintga ura sin il traject Claustra Plaz – Serneus – Saas. Haldenstein survegn ina nova colliaziun da baud cun bus e Favugn ina nova colliaziun da tard per Cuira.

Sin intgins auters trajects vegnan introducids curs supplementars da tren e da bus. Las amplificaziuns detagliadas da l'urari chattais Vus en il document agiuntà davart las midadas da l'urari 2020 en il Grischun sco er online sin la pagina d'internet www.fahrplanfelder.ch.

Nov sistem per charrar en cuminanza "taxito" sin il traject Cuira – Maladers

Per cumplettar il traffic public vegn introducì cun taxito per l'emprima giada en il Grischun in sistem per charrar en cuminanza, e quai sin il traject Cuira – Maladers.


Agiunta:

Las midadas las pli impurtantas


Infurmaziuns:

- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch

- Daniel Caduff, manader da project per il traffic public, uffizi d'energia e da traffic, tel. 081 257 36 27, e-mail Daniel.Caduff@aev.gr.ch


Gremi: uffizi d'energia e da traffic
Funtauna: rg uffizi d'energia e da traffic