A partir da la midada da l'urari dals 15 da december 2019 vegn en funcziun per l'emprima giada en il chantun Grischun in sistem da carpooling, e quai sin il traject Cuira – Maladers. Taxito metta a disposiziun sin quest traject ina purschida cumplementara al traffic public existent.
Taxito è in sistem per charrar spontanamain en cuminanza. El è vegnì sviluppà spezialmain per territoris rurals e sa basa sin la cultura da cuminanza. Senza registraziun u preannunzia pon ins laschar mussar – sur SMS – ils giavischs da charrar en cuminanza sin in display a las fermadas da Taxito, sco quai ch'i vegniva fatg pli baud cun in chartun faschond autostop. Sch'ina automobilista u in automobilist vegn sperasvia, vesa ella u el che la persuna che spetga è enconuschenta al sistem e nua che questa persuna vul viagiar. Spontanamain sa decida l'automobilista u l'automobilist da sa fermar e da prender cun sai la persuna che spetga. Avant ch'entrar trametta la passagiera u il passagier il numer da l'auto a Taxito, uschia che tant la passagiera u il passagier sco er la manischunza u il manischunz èn ussa enconuschents al sistem. Quest process porscha segirezza, senza ch'ina registraziun fiss necessaria.
2 francs per in viadi Cuira – Maladers
Per mintga viadi pajan las passagieras ed ils passagiers in pitschen import. Tranter Cuira e Maladers èn quai 2 francs che vegnan adossads a lur quint da telefonin. Las automobilistas ed ils automobilists che prendan cun sai passagieras e passagiers han il dretg d'in pitschen engraziament en furma dad 1 franc per viadi. Ellas ed els pon retrair questa summa cun sa registrar tar Taxito, ma pon er surlaschar ils daners a Taxito. Cun las indemnisaziuns da viadi che na vegnan betg retratgas entaifer 1 mais, sustegna l'interpresa projects culturals u ecologics en la regiun e procura uschia, ch'ils daners restan en la regiun. Quest sistem da carpooling po vegnir applitgà sin trajects che han in potenzial memia pitschen per ina nova lingia da traffic public, ma er per cumplettar la purschida existenta da traffic public, sco per exempel per serrar largias en il tact.
Sistem cumprovà
Purschì vegn quest autostop modern da la firma Taxito. Ses sistem da carpooling è en funcziun dapi 4 onns en differentas regiuns da la Svizra e da la Frantscha ed è sa cumprovà en diversas emprovas da pilot. Tranter auter han ils tests mussà che Taxito rinforza il traffic public e na concurrenzescha betg forsa quel, sco quai ch'i vegn savens temì. Las numerusas experientschas da questas autras raits pon vegnir integradas e nizzegiadas en las applicaziuns en il Grischun.
Cumplettaziun da la chadaina da transport
Cun Taxito vul il chantun Grischun rinforzar il traffic public sin il traject Cuira – Maladers cun stgaffir chadainas da transport supplementaras. Plinavant duai vegnir eruì, sche questa soluziun da carpooling vegn acceptada da la populaziun. Taxito n'excluda betg amplificaziuns da l'urari sco per exempel sin il traject Cuira – Maladers. Cun agid da quest sistem da carpooling vul il chantun render pli attractiv l'entir traffic public.
Infurmaziuns:
Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch
Gremi: uffizi d'energia e da traffic
Funtauna: rg uffizi d'energia e da traffic