Punctualmain per retrair il nov edifizi administrativ "sinergia" mida il Departament da construcziun, traffic e selvicultura (DCTS) ses num. Per il 1. d'avrigl 2020 daventa il DCTS da nov il Departament d'infrastructura, energia e mobilitad. Il nov num tudestg è "Departement für Infrastruktur, Energie und Mobilität", il nov num talian sa cloma "Dipartimento infrastrutture, energia e mobilità". En tut las trais linguas chantunalas porta il departament pia en l'avegnir la medema abreviaziun "DIEM". La Regenza ha approvà la revisiun parziala da l'Ordinaziun davart l'organisaziun da la Regenza e da l'administraziun (OORA; DG 170.310) ch'è colliada cun la midada dal num.

Cun la nova designaziun dal departament vegnan ils champs da cumpetenza e d'activitad descrits pli precis e confurm al temp. Il Departament d'infrastructura s'occupa ultra da la construcziun, er da la planisaziun, dal mantegniment e dal subvenziunament dals stabiliments d'infrastructura ils pli differents en ils secturs da la construcziun auta, da la construcziun bassa, da la correcziun dals curs d'aua, da l'avertura dal guaud e dals privels da la natira. En differentas rollas e cumpetenzas presta el – sur ils uffizis ora – ina contribuziun per sviluppar vinavant la mobilitad en il Grischun. Cun l'energia vegn la finala menziunà il champ d'activitad che daventa – pervia dals svilups (inter-)naziunals – pli e pli central per la lavur dal departament. Betg resguardadas en la nova designaziun èn incumbensas impurtantas en il sectur dal guaud sco er la chatscha e la pestga. Quai na po betg vegnir evità, perquai che la designaziun dal departament sto sa focussar sin maximalmain trais noziuns da secturs surordinads.

La Regenza ha approvà in project per la correcziun da la via da Roten tranter la clinica Beverin ed il surpassadi da viafier a Roten. Sin quest traject da la via na pon ils vehichels per part betg cruschar. Ultra da quai stoi vegnir fatg quint cun dapli pedunas e peduns tras l'engrondiment dal stabiliment giudizial, uschia che la situaziun daventa anc pli critica.

Per prevegnir a talas situaziuns da conflict prevesa il project planisà da schlargiar in traject da radund 850 meters lunghezza da la via sco er da construir in trottuar. La sanaziun totala meglierescha uschia la situaziun da traffic ed augmenta la segirezza da tut las participantas e da tut ils participants dal traffic. Plinavant gidan las mesiras previsas ad optimar considerablamain il mantegniment da la via ed il servetsch d'enviern. Ils custs dal project importan circa 2,86 milliuns francs.

La Regenza ha approvà il project "Renovaziun dal rempar da lavinas Tesa" da la vischnanca da Calanca. Ultra da quai ha ella deliberà ina contribuziun chantunala da circa 1,4 milliuns francs per la realisaziun da quest project. Il rempar da lavinas Tesa è vegnì construì ils onns 1898 fin 1903 e protegia dapi lura la fracziun Braggio. En spezial ils mirs dal rempar èn arrivads en il fratemp a la fin da lur durada da vita. En il rom dal project vegnan ils vegls mirs disfatgs e remplazzads tras ina nova construcziun d'atschal d'ina lunghezza totala da 430 meters. Ils custs totals importan var 1,9 milliuns francs. 

Mez december 2019 ha la Regenza approvà il contract da cumpra per l'acquist d'in bain immobigliar a Seewis-Pardisla per l'utilisaziun industriala. Il bain immobigliar cunfinescha cun la firma Georg Fischer Rohrleitungssysteme SA, ha ina grondezza da var 16 000 meters quadrat ed era proprietad da Fritz Pitschi. Il chantun garantescha tras quai la disponibladad dal bain immobigliar per eventuals projects d'expansiun d'interpresas existentas u per la nova domiciliaziun d'interpresas industrialas che han ina valurisaziun intensiva. Quai correspunda a la planisaziun directiva regiunala. Cun la firma Georg Fischer Rohrleitungssysteme SA ha il chantun concludì in dretg da cumpra per l'entir bain immobigliar. Il bain immobigliar è vegnì acquistà en stretga collavuraziun ed en enclegientscha cun la vischnanca da staziunament e cun la regiun Partenz/Tavau. La valurisaziun dal bain immobigliar vegn accordada cun ils basegns dal futur investider. Fin ch'il project d'investiziun vegn realisà vegn il bain immobigliar utilisà vinavant da l'agricultura. Il pretsch da cumpra da 2,6 milliuns francs correspunda al pretsch da martgà per surfatschas industrialas sumegliantas.

La Regenza ha approvà la revisiun parziala da la planisaziun locala che la vischnanca da Sumvitg aveva concludì il 1. da matg 2019. Il vitg da Rabius po uschia vegnir distgargià dal traffic da camiuns pesants che resulta da la zona da mastergn Igniu e dal manaschi d'elavuraziun da gera. En il futur po il traffic da camiuns pesants da quest territori vegnir manà directamain sin la via principala chantunala (via sursilvana H19).