La Regenza ha deliberà la missiva concernent in rinforzament da la tgira d'uffants cumplementara a la famiglia e concernent l'aboliziun da la Lescha davart contribuziuns da maternitad per mauns dal Cussegl grond. Cun la missiva vul la Regenza meglierar la cumpatibilitad da la professiun cun la famiglia. L'instrument da las contribuziuns da maternitad dat impuls da gudogn negativs. Perquai duai la legislaziun correspundenta vegnir abolida, cun prevair a medem temp mesiras accumpagnantas per famiglias al minimum d'existenza.

En la sessiun da zercladur 2019 ha il Cussegl grond acceptà l'incumbensa Hardegger concernent la revisiun da la Lescha davart la promoziun da la tgira d'uffants cumplementara a la famiglia en il chantun Grischun. La Regenza ha renconuschì il basegn d'agir. En sia resposta ha ella proponì mesiras per rinforzar la tgira d'uffants cumplementara a la famiglia cun abolir a medem temp la Lescha davart contribuziuns da maternitad, perquai che quella dat impuls da gudogn negativs. Ina colliaziun da las contribuziuns da maternitad cun la tgira d'uffants cumplementara a la famiglia è cunvegnenta, perquai che las finamiras dals dus instruments han puncts cuminaivels. Tuts dus instruments contribueschan a la segirezza finanziala da famiglias e vulan garantir ina buna tgira dals uffants.

Contribuziuns da maternitad na correspundan betg al temp
Il project tegna quint da las relaziuns socialas: L'activitad professiunala da tuts dus geniturs duai vegnir sustegnida e betg impedida. L'instrument da las contribuziuns da maternitad dat impuls da gudogn negativs, perquai ch'i n'è da princip betg giavischà ch'il genitur che tgira haja in'activitad professiunala. Il mument da l'introducziun da las contribuziuns da maternitad era quai stà la voluntad politica e sociala. Dapi l'introducziun da la Lescha davart contribuziuns da maternitad l'onn 1992 èn vegnidas prendidas – sin plaun federal e chantunal – differentas decisiuns politicas concernent la societad e concernent ils fatgs socials per promover la cumpatibilitad da la professiun cun la famiglia e per cumbatter cunter la mancanza da persunas spezialisadas. Oz vegni spetgà che tuts dus geniturs possian avair in'activitad professiunala. Pervia da quai exista in basegn d'agir areguard las contribuziuns da maternitad.

Promover pli fitg la tgira d'uffants cumplementara a la famiglia
Ils meds finanzials che vegnan libers tras l'aboliziun da las contribuziuns da maternitad vegnan impundids per la promoziun supplementara da la tgira d'uffants cumplementara a la famiglia. Ultra d'ina promoziun pli intensiva da la tgira d'uffants cumplementara a la famiglia vegn l'aboliziun da las contribuziuns da maternitad mitigiada cun agid d'ulteriuras mesiras en il sectur da l'agid social. Il project prevesa plinavant mesiras per impedir che tschertas grevezzas finanzialas vegnian adossadas a las vischnancas. Tut en tut duai il project vegnir realisà senza chaschunar custs supplementars.

Ulteriuras mesiras
Las mesiras previsas en la missiva duain reducir las difficultads finanzialas da las instituziuns d'assistenza en il sectur da la tgira d'uffants cumplementara a la famiglia. Actualmain vegnan elavuradas ulteriuras soluziuns. Previsa è ina revisiun fundamentala da la lescha, che cuntegna ina nova regulaziun dal subvenziunament e che coordinescha l'indemnisaziun da las prestaziuns da tgira per uffants sistematicamain cun las entradas e cun la facultad da las persunas responsablas per l'educaziun. A medem temp duai uschia vegnir reducida la lavur administrativa ch'ils furniturs da prestaziuns ston impunder per eruir las datas fiscalas da las persunas responsablas per l'educaziun.

Agiunta:
missiva


Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremi: Regenza
Funtauna: rg Departament d'economia publica e fatgs socials