Tar duas persunas en il chantun Grischun è vegnì cumprovà il coronavirus COVID-19. Questas persunas èn en in bun stadi da sanadad. Ellas èn vegnidas ospitalisadas preventivamain e vegnan tgiradas bain. En stretga cunvegnientscha cun l'Uffizi federal da sanadad publica UFSP ha il chantun prendì tut las mesiras per prevegnir ad ina transmissiun dal virus sin ulteriuras persunas. Pertutgadas da las mesiras preventivas èn actualmain las regiuns Malögia, Bernina, Engiadina bassa/Val Müstair e Moesa.
L'analisa dal Center naziunal da referenza per novas malsognas viralas (CNMV) a Genevra ha confermà il suspect che las duas persunas han piglià il nov coronavirus. Malsauns èn dus uffants d'ina famiglia taliana ch'è en vacanzas en Engiadin'ota. Els mussan sintoms, èn però en in bun stadi da sanadad. Els èn vegnids ospitalisads sin basa da las directivas dal UFSP d'isolar persunas pertutgadas. En il rom dal manaschament da contact èn quatter persunas vegnidas messas sut quarantina per las observar. Duas da quellas – numnadamain stretgas persunas da referiment dals uffants pertutgads – èn er en l'ospital. Ils resultats da test da questas duas persunas n'èn anc betg avant maun.
Prevenziun: occurrenzas grondas vegnan ditgas giu – pertutgà è il maraton da passlung da l'Engiadina
"Il chantun ha ussa prendì mesiras per impedir ina transmissiun dal virus sin ulteriuras persunas", ha ditg il cusseglier guvernativ Peter Peyer. Latiers tutgi che l'Uffizi da sanadad ha disponì che occurrenzas publicas da caracter surregiunal èn scumandadas per entant en las regiuns Malögia, Bernina, Engiadina bassa/Val Müstair e Moesa fin e cun ils 8 da mars 2020. Quai pertutga oravant tut il maraton da passlung da l'Engiadina e las occurrenzas en il conturn da questa cursa. Per las autras parts dal chantun Grischun recumonda l'Uffizi da sanadad da renunziar ad occurrenzas pli grondas. "Quai vala en spezial per occurrenzas, tar las qualas las participantas ed ils participants na pon betg vegnir identifitgads e testads u isolads sche necessari", uschia la media chantunala Marina Jamnicki.
Actualmain datti var 20 cas da suspect en il chantun Grischun – ils scleriments han lieu
Ultra dals dus cas confermads datti en l'entir chantun actualmain var 20 cas da suspect nunconfermads sco er set cas da suspect ch'èn sa mussads sco negativs. Ils scleriments han lieu sur ils laboratoris ch'èn vegnids determinads da la Confederaziun.
Ils gremis cumpetents dal chantun giuditgeschan la situaziun permanentamain da nov.
| Infurmaziuns per la populaziun |
Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus
Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica:
telefon: +41 58 463 00 00 (mintga di da las 8.00 a las 18.00)
Infurmaziuns a la populaziun da lingua taliana dat la hotline dal chantun Tessin:
telefon: 0800 144 144 (mintga di da las 7.00 a las 22.00)
|
Contact per las medias fin gievgia, ils 27 da favrer 2020, a las 8.00:
Departament da giustia, segirezza e sanadad, tel. +41 81 257 25 13, e-mail: info@djsg.gr.ch
Gremi: Regenza
Funtauna: rg Chanzlia chantunala