Il Cussegl federal ha relaschà oz avantmezdi – en il rom da sia cumpetenza en la Lescha d'epidemias – in'Ordinaziun davart las mesiras per cumbatter il coronavirus. Il chantun Grischun ha adattà correspundentamain las mesiras ch'el aveva gia prendì.

Las mesiras ch'il chantun Grischun ha decretà ier per las regiuns Malögia, Bernina, Engiadina bassa/Val Müstair e Moesa vegnan extendidas sin tut il chantun. Plinavant vegnan las mesiras chantunalas adattadas a l'Ordinaziun dal Cussegl federal en quel senn che las restricziuns menziunadas en ella vegn a valair explicitamain er per occurrenzas privatas. La disposiziun vegn rendida pli clera en quel senn che occurrenzas publicas e privatas cun caracter surregiunal e/u cun participaziun internaziunala èn scumandadas sin l'entir territori chantunal. Ultra da quai vegn l'ordinaziun adattada areguard la durada a quella dal Cussegl federal, vul dir fin ils 15 da mars.

Concretamain vul quai dir che las suandantas mesiras valan per entant fin ils 15 da mars 2020:

• occurrenzas publicas e privatas cun pli che 1000 participantas e participants èn scumandads sin l'entir territori chantunal;
• occurrenzas publicas e privatas cun main che 1000 participantas e participants cun caracter surregiunal e/u cun participaziun internaziunala èn scumandadas sin l'entir territori chantunal;
• en cas d'occurrenzas publicas e privatas cun main che 1000 participantas e participants senza caracter surregiunal e/u participaziun internaziunala: ensemen cun las autoritads chantunals èn ils organisaturs obligads da ponderar ordavant las ristgas areguard la realisaziun da l'occurrenza.

Ils organisaturs entran en contact sur il formular che sa chatta sin la pagina d'internet www.gr.ch/coronavirus. I ston vegnir fatgas las suandantas indicaziuns:

• organisatur
• data da la realisaziun, temp e lieu
• gener ed andament da l'occurrenza
• dumber spetgà da participantas e da participants (en spezial divisiun en participantas e participants ed en aspectaturas ed aspectaturs, sche pussaivel)
• pussaivladad da suandar las participantas ed ils participants sco er opziun d'entrar en contact cun ellas e cun els
• mesiras previsas per impedir la chadaina da transmissiun

Sin la pagina d'internet www.gr.ch/coronavirus vegnan messas a disposiziun permanentamain infurmaziuns actualas.

Agiuntas:
disposiziun chantunala

communicaziun a las medias tras la Confederaziun
ordinaziun dal Cussegl federal concernent occurrenzas
factsheet per la situaziun speziala



Gremi: Regenza
Funtauna: rg Chanzlia chantunala