La Regenza ha approvà la revisiun parziala da la planisaziun locala che la vischnanca da Tavau aveva concludì ils 19 da matg 2019. Uschia vegnan stgaffidas las premissas per engrondir l'Institut da perscrutaziun AO. Quel planisescha d'amplifitgar sias activitads da perscrutaziun e da construir ina halla/stalla supplementara tranter ils edifizis da la clinica e las stallas existentas. Tut en tut duai la zona da perscrutaziun vegnir engrondida per var 6575 meters quadrat.

La AO Foundation (Cuminanza da lavur per dumondas d'osteosintesa) è ina societad medicinala che vegn manada d'ina gruppa internaziunala da chirurgs e ch'è sa spezialisada sin il tractament da ruttadiras d'ossa e da l'apparat motoric. L'Institut da perscrutaziun AO Tavau porscha actualmain passa 70 plazzas da lavur per perscrutadras e perscrutaders, per emprendistas ed emprendists sco er per praticantas e praticants. El profita da las sinergias da la rait AO globala da passa 15 000 chirurgas e chirurgs ed è colliada en l'economia sin plaun internaziunal sur partenadis e cooperaziuns cun diversas interpresas impurtantas da la branscha. Plinavant s'engascha l'Institut da perscrutaziun en las stentas chantunalas da rinforzar il Grischun sco lieu da perscrutaziun, sco per exempel tar la Graduate School dal Grischun, en la citad da scienza Tavau u en partenadis cun la Scola auta spezialisada dal Grischun.

©Comet Photoshopping ScRL / Dieter Enz

La Regenza ha dà glisch verda per la midada d'utilisaziun da la chasa da scola primara a Curaglia. La Regenza ha approvà la revisiun parziala da la planisaziun locala che la vischnanca da Medel (Lucmagn) aveva concludì ils 28 da november 2019.

La chasa da scola primara – ch'è situada amez Curaglia e che na vegn dapi l'onn 2018 betg pli duvrada per l'instrucziun – duai vegnir transfurmada en ina chasa da pliras generaziuns. Suenter che la scola primara è vegnida serrada, è l'intent public da l'anteriura chasa da scola daventà obsolet. Per quest motiv vul la vischnanca stgaffir tschintg abitaziuns da locaziun per persunas respectivamain per famiglias ch'èn domiciliadas al lieu. Perquai ch'ina tala utilisaziun n'è betg confurma a la lescha en l'uschenumnada zona per edifizis e per stabiliments publics, duai la parcella respectiva vegnir attribuida a la "zona d'abitar 3".

©Comet Photoshopping ScRL / Dieter Enz