La Regenza ha deliberà la missiva tar la revisiun parziala da la Lescha chantunala davart il guaud per mauns dal Cussegl grond. Il project duai cunzunt reglar pli cleramain las cumpetenzas en il sectur dal management integral da las ristgas en connex cun privels da la natira.

La Lescha chantunala davart il guaud è en vigur dapi l'onn 2013. Las regulaziuns legalas èn sa cumprovadas en la pratica. Ma en singuls secturs exista in basegn d'agir respectivamain d'adattaziun. Per l'ina ha il management da privels da la natira survegnì evidentamain dapli impurtanza, uschia che l'urden da cumpetenzas vivì e cumprovà duai vegnir francà pli cleramain en la lescha. Per l'autra vali da realisar las novas prescripziuns dal dretg federal concernent il cumbat cunter organissems nuschaivels. La revisiun parziala permetta la finala d'adattar ulteriuras regulaziuns e da facilitar lur execuziun.

Management integral da las ristgas: cumpetenzas ed incumbensas
La strategia da clima dal chantun Grischun metta ses accent sin il rinforz dal management integral da las ristgas en cas da privels da la natira. Ina finamira correspundenta cuntegnan er il Program da la Regenza 2017 fin 2020 ed il Program da la Regenza per ils onns 2021 fin 2024 ch'è vegnì elavurà dacurt cuminaivlamain da la Regenza e dal parlament. Cun la revisiun parziala da la Lescha davart il guaud duain las cumpetenzas vegnir regladas pli cleramain. Il chantun, las vischnancas sco er eventualas terzas varts ch'èn – sin fundament da leschas spezialas – responsabels per la segirezza da las infrastructuras, duain vegnir integrads en l'urden da cumpetenzas.

Organissems nuschaivels: adattaziun al dretg federal midà
Il dretg federal midà prevesa novas incumbensas respectivamain incumbensas extendidas per il chantun e per terzas varts pertutgadas. Questas incumbensas pertutgan mesiras cunter organissems nuschaivels che pericliteschan considerablamain il mantegniment dal guaud e da sia funcziun. Per pudair garantir ina legislaziun forestala chantunala ch'è confurma al dretg federal èn necessarias adattaziuns en il dretg chantunal.

Privel d'incendi da guaud e da cultira: execuziun simplifitgada
L'execuziun dal scumond da far fieu en cas da privel d'incendi da guaud e da cultira pli grond duai vegnir simplifitgada, mantegnend las cumpetenzas fundamentalas dal chantun e da las vischnancas. Las vischnancas pon prevair excepziuns dal scumond da far fieu per fuclars segirs ordaifer il guaud.

Il Cussegl grond vegn a tractar quest project previsiblamain durant la sessiun da zercladur 2020.


Agiunta:
missiva


Infurmaziuns:
cusseglier guvernativ dr. Mario Cavigelli, schef dal Departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: Regenza
Funtauna: rg Chanzlia chantunala