La Regenza grischuna chapescha ils quitads da la regiun Moesa pervia da l'ulteriura derasaziun dal coronavirus en lur vals. Ina delegaziun da la Regenza e dal Stab directiv chantunal ha visità oz la regiun Moesa ed è sa scuntrada cun represchentantas e represchentants da la regiun. La delegaziun ha suttastritgà sia posiziun che las mesiras da la Confederaziun stoppian vegnir realisadas tenor las prescripziuns federalas e che acziuns dals chantuns en atgna reschia na sajan betg cunvegnentas.

14 deputadas, deputads e presidents communals da la regiun Moesa èn sa scuntrads il glindesdi a San Bernardin cun ils cussegliers guvernativs Peter Peyer e Marcus Caduff sco er cun il schef dal Stab directiv chantunal Martin Bühler per in barat cuminaivel. Ils represchentants dal chantun han suttastritgà l'impurtanza d'ina gestiun centrala da las mesiras cunter il coronavirus tras la Confederaziun. Quella aveva declerà cler e net che mesiras chantunalas che cuntrafetschian a las disposiziuns valaivlas da la Confederaziun, na sajan betg pussaivlas.

Las represchentantas ed ils represchentants han ludà la collavuraziun cun las autoritads chantunalas ed han confermà che regulaziuns localas per la Moesa hajan pudì vegnir realisadas fin ussa, cun excepziun da la pretensiun da serrar ils plazzals. Il cusseglier guvernativ Marcus Caduff ha suttastritgà ch'il chantun saja er vinavant pront da conceder talas excepziuns regiunalas, uschenavant ch'ellas na cuntrafetschian betg a las prescripziuns da la Confederaziun. Il Grischun ha prendì enconuschientscha oz dal fatg che la Confederaziun examinescha da stgaffir "fanestras da crisa" regiunalas.

La regiun Moesa na saja betg suletta, ha punctuà il cusseglier guvernativ Peter Peyer. Il chantun fetschia tut il pussaivel per realisar las mesiras da la Confederaziun uschia, ch'ellas pussibiliteschian er al sid dal chantun ina protecziun efficazia cunter in'ulteriura derasaziun dal virus. En quest connex sa chattian la Moesa, la Bregaglia, il Puschlav, la Val Müstair e l'Engiadina en situaziuns particularas. La lavur da communicaziun per talian vegnia intensivada er vinavant per cuntanscher anc meglier la populaziun dal Grischun talian. Plinavant ha Peter Peyer confermà ch'il provediment cun ospitals saja garantì per la regiun Moesa – sche necessari – er tras l'ospital da Tusaun e tras l'ospital chantunal a Cuira, en cas che las capacitads duvradas er en il Tessin na bastassan betg pli.

La delegaziun sa renda perquai il mardi a Puntraschigna, nua ch'ella sa scuntra cun represchentantas e represchentants da l'Engiadina e da las autras vals dal sid. A la fin da la scuntrada han las represchentantas ed ils represchentants da la Moesa suttastritgà lur confidenza en la Regenza e las numerusas posiziuns cuminaivlas. Ins spetgia ussa ch'il Cussegl federal anticipeschia la situaziun futura e na reageschia betg cun retard.

Infurmaziuns

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica: Telefon: +41 58 463 00 00 (mintga di, di e notg) Infurmaziuns per las collavuraturas ed ils collavuraturs da las medias, per il sectur da sanadad, per las vischnancas e per las scolas Dumondas pon vegnir drizzadas er vinavant directamain al post da communicaziun per il coronavirus: Uras da manaschi mail: glindesdi fin dumengia 08.00 – 17.00 Uras da manaschi telefon: glindesdi fin venderdi 08.00 – 19.00 E-mail medias: kfsmedien@amz.gr.ch   E-mail sectur da sanadad: kfsmedical@amz.gr.ch   E-mail vischnancas, scolas & lavur: kfsinfo@amz.gr.ch   Telefon: +41 81 254 16 00

Gremi: Regenza
Funtauna: rg Chanzlia chantunala