La Regenza ha prendì enconuschientscha dal rapport davart las posiziuns inoltradas dals posts da servetsch e da las instituziuns linguisticas tar il rapport d'evaluaziun dal Center per democrazia Aarau (ZDA) concernent la promoziun da linguas en il chantun Grischun dals 31 da mars 2019.
Il mars 2019 ha l'Uffizi federal da cultura publitgà il rapport "Mesiras per mantegnair e per promover la lingua e la cultura rumantscha etaliana en il chantun Grischun". Il Departament d'educaziun, cultura e protecziun da l'ambient dal Grischun (DECA) ha sin quai envidà ils posts da servetsch e las instituziuns, che vegnan menziunads directamain en il rapport, da prender posiziun tar ils puncts crititgads e tar las propostas fatgas en il rapport. Da las singulas posiziuns resulta da princip la conscienza per l'impurtanza da la trilinguitad chantunala, ma er la prontezza da gidar a meglierar vinavant la preschientscha da las duas linguas chantunalas minoritaras rumantsch e talian en il rom da las disposiziuns legalas sco er da las pussaivladads persunalas e finanzialas. Ils posts da servetsch e las instituziuns linguisticas pertutgadas han plinavant preschentà las libertads e las pussaivladads d'agir en connex cun la lavur pratica dal mintgadi.
L'analisa da la situaziun è ussa terminada. En il proxim pass sa tracti d'utilisar las infurmaziuns collecziunadas e da formular mesiras concretas che sa laschan realisar en la pratica. La Regenza lascha elavurar il DECA in rapport correspundent cun mesiras concretas per ils differents secturs da l'agir statal (politica, administraziun, furmaziun, medias, economia, cultura e.a.).

La via d'Engiadina è la ruta da traffic la pli impurtanta da l'Engiadina. Tranter Martina ed Ovella era vegnida approvada e planisada l'onn 2018 ina gallaria d'ina lunghezza da 60 meters sco protecziun cunter crudadas da crappa. Ultra da quai era vegnida resalvada la pussaivladad da prolungar la gallaria per proteger la via cunter lavinas. La Regenza ha ussa approvà in project per prolungar la gallaria.
Pervia da las crudadas da crappa la primavaira 2019 sin il traject Mingèr è vegnida giuditgada da nov la periclitaziun tras crudadas da crappa. Per proteger duraivlamain las participantas ed ils participants dal traffic cunter crudadas da crappa e cunter lavinas vegn prolungada la gallaria planisada da 60 meters a 240 meters. Il stabiliment vegn realisà en il rom da la correcziun da la via Martina – Ovella ch'è gia terminada fin al traject cun la gallaria planisada. Ils custs totals dal project importan circa 18,1 milliuns francs.

©Uffizi federal da topografia

La Regenza ha approvà la revisiun parziala da la planisaziun locala ch'era vegnida concludida da la vischnanca da Lantsch ils 27 da mars 2019. Uschia vegnan stgaffidas las basas da la planisaziun d'utilisaziun per amplifitgar il stabiliment da biatlon en la vischnanca. En il center da l'amplificaziun stat ina prolungaziun da la pista da skis cun rodas per circa 3,6 kilometers a da nov 5,2 kilometers. Uschia po l'arena da biatlon a Lantsch servir er la stad sco lieu da trenament naziunal ed internaziunal renconuschì ed attractiv. Ulteriuras amplificaziuns duain pussibilitar da daventar il lieu per concurrenzas grondas ed internaziunalas (tranter auter occurrenzas da la cuppa mundiala). Plinavant èsi planisà da construir in percurs da moviment e da trenament. Sin quest percurs pon uffants, giuvenils e persunas creschidas, ma er atletas ed atlets s'acquistar abilitads da moviment fitg differentas.

©Uffizi federal da topografia

Cun in pèr correcturas e resalvas ha la Regenza approvà la revisiun parziala da la planisaziun locala che la vischnanca da Claustra-Serneus aveva concludì ils 25 da november 2018. Cun questa revisiun parziala vegnan stgaffidas las premissas da la planisaziun d'utilisaziun per construir in resort da vacanzas per famiglias en la vischinanza da la staziun da val da las Telefericas Claustra-Madrisa SA. Per il resort èn previsas 78 chombras d'hotel e 71 abitaziuns explotadas cun recepziun e sectur da spa sco er in restaurant. Plinavant duai vegnir construida al vest da la via da Schlappin ina chasa da parcar cun 463 plazzas.

©Comet Photoshopping ScRL / Dieter Enz

DLa Regenza sustegna il project da perscrutaziun e da publicaziun "Atlas tar l'istorgia dal Grischun 1524 fin 2024" ed ha concedì ina contribuziun chantunala da 900 000 francs per quest project. Ils iniziants dal project èn l'Archiv dal stadi dal Grischun e l'Institut per la perscrutaziun da la cultura grischuna. En tschintg secturs tematics (populaziun, ambient, economia, politica, cultura) duai l'atlas statistic-istoric visualisar mintgamai circa diesch temas cun agid da chartas. Ils temas vegnan plinavant cumplettads cun datas e cun graficas statisticas sco er cun texts explicativs. Cun sia idea visuala vul l'ovra planisada intermediar l'istorgia en moda e maniera moderna e duai pudair vegnir applitgada er en las scolas grischunas. Il motiv per la publicaziun l'onn 2024 èn il giubileum da 500 onns da la Republica da las Trais Lias sco er la fundaziun da la Lia Grischa l'onn 1424.