Il president da la regenza Christian Rathgeb ed il schef dal Stab directiv chantunal Martin Bühler èn sa scuntrads oz a Roveredo cun il president da la regiun Moesa Christian De Tann, cun il deputà da Roveredo Manuel Atanes, cun il deputà e president communal da Grono Samuele Censi, cun il president communal da Roveredo Guido Schenini sco er cun il schef dal Stab directiv regiunal da la regiun Moesa Moreno Monticelli.

Tar questa scuntrada ha il president da la regenza Christian Rathgeb empermess sustegn per la regiun Moesa. Il scopo da la maisa radunda è stà quel d'analisar las circumstanzas actualas cun ils represchentants locals da la politica e da l'economia e da discutar la situaziun en connex cun las pretensiuns d'ina fanestra da crisa da singulas vischnancas en la regiun Moesa. Plinavant han il schef dal Stab directiv chantunal sco er il schef dal Stab directiv regiunal pudì discutar davart la situaziun actuala en la regiun Moesa ed en il Tessin sco er en las ulteriuras regiuns. Ins è sa cunvegnì d'intensivar pli fitg la communicaziun cuminaivla ed il giudicament communabel da la situaziun, en spezial, sche las mesiras da la Confederaziun u dal chantun Tessin vegnan adattadas. Ina prioritad speziala duai vegnir attribuida a la communicaziun da la media chantunala concernent la situaziun da sanadad en las valladas dal sid.

La Regenza è bain conscienta da la situaziun difficila en spezial da la populaziun, dals patruns e dals lavurants en las regiuns da cunfin dal Grischun cun l'Italia e cun il chantun Tessin. Il chantun vegn a far tut per las regiuns per dumagnar la situaziun, ed el è avert per il dialog.

Il president da la Regenza, il president da la regiun sco er tut ils preschents rendan attent a Roveredo a la necessitad da realisar cuminaivlamain las mesiras per proteger la sanadad da la populaziun. Unanimitad è ussa urgentamain necessaria, pass per pass, per che questa crisa possia vegnir dumagnada er en reguard a l'economia.

Fotografia agiuntada:

Infurmaziuns:

- president da la Regenza dr. Christian Rathgeb, schef dal Departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch
- Martin Bühler, schef dal Stab directiv chantunal, tel. 081 257 35 22, e-mail Martin.Bühler@amz.gr.ch

Gremi: Stab directiv chantunal / CoronaComm
Funtauna: Stab directiv chantunal / CoronaComm