L'Uffizi da migraziun e da dretg civil ha realisà svelt e consequentamain las prescripziuns da la Confederaziun en il sectur d'asil. Per proteger las requirentas ed ils requirents d'asil sco er las collavuraturas ed ils collavuraturs da l'Uffizi da migraziun e da dretg civil cunter il coronavirus vegnan las mesiras d'igiena applitgadas en moda consequenta. En collavuraziun cun la Protecziun civila vegnan plinavant averts u preparads ulteriurs alloschis per stgaffir plazza supplementara per pudair observar ina distanza segira. L'Uffizi da migraziun e da dretg civil examinescha cuntinuadamain la situaziun actuala ed adatta correspundentamain sias mesiras per garantir la segirezza dals umans.
L'Uffizi da migraziun e da dretg civil ha reagì immediatamain sin l'ordinaziun d'urgenza dal Cussegl federal en il sectur d'asil ed ha realisà svelt las prescripziuns per la collocaziun da las requirentas e dals requirents d'asil. Permanentamain vegnan examinadas e realisadas en moda flexibla ulteriuras mesiras per garantir la segirezza da las requirentas e dals requirents d'asil sco er da las collavuraturas e dals collavuraturs. L'Uffizi da migraziun è en stretg contact cun il Secretariat da stadi per migraziun (SEM).
Il chantun avra ulteriurs alloschis cun il sustegn da la Protecziun civila
Actualmain èn collocadas 480 persunas en diesch centers d'asil en il chantun Grischun. L'occupaziun importa da preschent 55 pertschient (853 plazzas disponiblas). Per ademplir las mesiras da l'Uffizi federal da sanadad publica (UFSP) èn vegnidas fatgas immediatamain adattaziuns architectonicas, manaschialas ed organisatoricas en ils alloschis collectivs dal chantun Grischun (naginas permissiuns da congedis, scumond per terzas persunas d'entrar en chasa, nagins transfers tranter ils centers, extensiun da las uras d'avertura da la cuschina e da la lavandaria, utilisaziun separada dals locals cuminaivels, naginas maisas da mezdi pli). Spezialmain vegni er fatg attenziun che las chombras vegnian occupadas minimalmain. Per che las abitantas ed ils abitants sco er las collavuraturas ed ils collavuraturs sajan protegids uschè bain sco pussaivel, è vegnida averta ils 25 da mars l'immobiglia da reserva a Mustér. Ulteriurs alloschis a Cuira ed a Spleia vegnan actualmain preparads per in'avertura. Cun questa mesira po l'occupaziun en ils singuls manaschis vegnir reducida fermamain entaifer curt temp ed en moda flexibla. Las prescripziuns da "social distancing" pon uschia vegnir observadas.
Per garantir il manaschi dals ulteriurs alloschis vegn l'Uffizi da migraziun e da dretg civil sustegnì da commembras e commembers da la Protecziun civila. Els vegnan engaschads en spezial per controllas d'access e sche necessari per incumbensas d'assistenza. Ulteriuras purschidas da sustegn persunalas voluntaras vegnan examinadas.
Preparà per cas da suspect da corona
Er per garantir l'assistenza en cas d'in eventual suspect d'ina infecziun cun il coronavirus èn ins preparà. Chombras d'isolaziun correspundentas èn vegnidas endrizzadas e preparadas. L'assistenza ed il proceder en cas d'in suspect vegnan coordinads stretgamain cun la media chantunala. Cuminaivlamain èn vegnidas definidas mesiras immediatas. Per il mument na datti nagins cas da suspect u d'infecziun en ils centers d'asil dal chantun Grischun.
Engraziament a las collavuraturas ed als collavuraturs
Il cusseglier guvernativ Peter Peyer engrazia a tut las collavuraturas ed a tut ils collavuraturs da l'Uffizi da migraziun e da dretg civil per lur grond engaschament instancabel. La situaziun actuala pretenda er en quest sectur blera flexibilitad durant il mintgadi da lavur. Las collavuraturas ed ils collavuraturs èn dumandads fermamain e fan blera lavur supplementara per garantir mintga di uschè bain sco pussaivel il bainesser e la sanadad da las requirentas e dals requirents d'asil.
Tut las infurmaziuns actualas sut:
www.gr.ch/coronavirus
https://www4.ti.ch/dss/dsp/covid19/home/
Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch
- Marcel Suter, manader da l'Uffizi da migraziun e da dretg civil, tel. 081 257 25 21, e-mail Marcel.Suter@amz.gr.ch
Gremi: Departament da giustia, segirezza e sanadad
Funtauna: rg Departament da giustia, segirezza e sanadad