A chaschun da sia sesida dals 15 d'avrigl 2020 ha la Cumissiun da gestiun dal Cussegl grond (CdG) approvà differentas dumondas da credits posteriurs che la Regenza aveva fatg en connex cun la situaziun actuala da corona.
En l'ultim temp ha la Regenza prendì – sco cumplettaziun da las mesiras da la Confederaziun – differentas mesiras chantunalas en connex cun la situaziun actuala da corona. Quellas eran per part colliadas cun dumondas a la CdG da deliberar credits posteriurs. A chaschun da sia sesida dals 15 d'avrigl 2020 ha la CdG tractà las dumondas da credits posteriurs.
Las posiziuns approvadas cun las summas las pli grondas stattan en connex cun mesiras chantunalas, davart las qualas la Regenza aveva gia infurmà la publicitad cun communicaziuns a las medias separadas:
- Mesiras per mitigiar las consequenzas dal coronavirus per il sport e per la cultura: dus credits posteriurs per mesiras COVID-19 per la promoziun dal sport dad 1 milliun francs e per mesiras COVID-19 per la promoziun da la cultura da 3 milliuns francs (Communicaziun a las medias da la Regenza).
- Contribuziuns extraordinarias per segirar la tgira d'uffants cumplementara a la famiglia: in credit posteriur cumpensà per part dad 1 milliun francs per mesiras COVID-19 per la tgira d'uffants cumplementara a la famiglia (Communicaziun a las medias da la Regenza).
- Concessiun da sustegn finanzial als ospitals: dus credits posteriurs per contribuziuns als ospitals publics per prestaziuns d'utilitad publica da 5 milliuns francs e per contribuziuns a las perditas d'entradas en il sectur da sanadad en connex cun COVID-19 da brutto 72 milliuns francs. Pervia d'expensas pli pitschnas stimadas per contribuziuns a prestaziuns medicinalas da 18 milliuns francs resulta en quest connex ina chargia finanziala da maximalmain 59 milliuns francs per il chantun (Communicaziun a las medias da la Regenza).
En sia proxima sesida vegn il Cussegl grond – sco prescrit da la lescha – orientà da la CdG davart las dumondas da credits posteriurs approvadas da la Regenza.
Infurmaziuns:
Silvia Casutt-Derungs, presidenta da la Cumissiun da gestiun, tel. +41 79 360 32 66
Gremi: Cumissiun da gestiun
Funtauna: rg Cumissiun da gestiun