Avant prest tschintg emnas è l’instrucziun da preschientscha vegnida interrutta en las scolas dal Grischun. En in'emprima fasa han ils purtaders da scola planisà e testà l’instrucziun a distanza. Dapi prest trais emnas vegn instruì cun questa nova furma, per part a moda digitala, per part a moda analoga sco era en cumbinaziun da las duas furmas.

Da l’entschatta ennà ha l’inspecturat da scola – en stretga collavuraziun cun il Departament d'educaziun, cultura e protecziun da l'ambient – sustegnì las scolas cun respunder a numerusas dumondas da las direcziuns da scola.
Uschia ha l’instrucziun a distanza cumenzà bain ed ils resuns da las scolas èn positivs. Las scolaras ed ils scolars han in mintgadi structurà ed èn stediamain en contact cun lur persunas d’instrucziun. Scolaras e scolars da lingua estra e tals cun difficultads d’emprender vegnan sustegnids spezialmain da la pedagoga curativa respectivamain da la persuna d’instrucziun per uffants da lingua estra.

Finamira da la visita
La finamira principala da la visita è stada quella da vesair persunalmain la situaziun en ina scola dal territori rumantsch, da vesair co l’instrucziun a distanza funcziuna suenter quasi trais emnas. Natiralmain è er stada en il center la discussiun cun ils pertutgads, pia cun las persunas d’instrucziun, cun la direcziun e cun il cussegl da scola.

Visita en Lumnezia
L'emprim ha gì lieu ina visita a Cuschnaus/Morissen tar las partiziuns da la 3./4. classa e 5./6. classa. En la 3. e 4. classa ha il schef dal departament pudì prender invista da las lavurs preparadas da la persuna d’instrucziun per l’emna proxima. Questas classas lavuran surtut a moda analoga, las lavurs vegnan tramessas als uffants per posta. En la 5. e 6. classa ha la persuna d’instrucziun instruì a distanza ina gruppa da scolaras e scolars. Questas classas lavuran surtut a moda digitala, en roms sco sport, zambregiar ed auters dentant er cun meds analogs.

A Vella ha la mussadra da scolina explitgà la lavur cun lur uffants pitschens, las preparativas per ils proxims dis, sco era las bellas fotografias ch'ils uffants han tramess ad ella. Per la 1. e 2. classa ha la persuna d'instrucziun preschentà videos d’emprender per ils uffants, mo era per ils geniturs a chasa. 
Il stgalim superiur lavura surtut cun meds digitals. Il cusseglier guvernativ ha pudì sa metter en la rolla dals scolars e sa participar activamain ad ina sequenza d’emprender.

En la scola da la Lumnezia han ins pudì prender ina bun'invista da differentas furmas da l’instrucziun a distanza, cunzunt era en las furmas analogas che vegnan duvradas en roms da la musa, per exempel sport, chant u zambregiar, e che na chattan betg tanta menziun en las medias.
La scola ha installà bain l'instrucziun a distanza, mo sa legra da puspè esser  da cumpagnia en scola.

Fotografias:

Da sanestra: Alexi Nay, manader da l'inspecturat districtual Surselva; Elisabeth Lorez, presidenta dal cussegl da scola da la vischnanca da Lumnezia; dr. Jon Domenic Parolini, cusseglier guvernativ; Conradin Caduff, manader da scola da la vischnanca da Lumnezia

Infurmaziuns:
- Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient dal Grischun, tel. +41 81 257 27 12, e-mail Jondomenic.Parolini@ekud.gr.ch
- Alexi Nay, inspectur da scola district III, tel. +41 81 257 62 20, e-mail Alexi.Nay@avs.gr.ch

Gremi: Departament d'educaziun, cultura e protecziun da l'ambient
Fontana: rg Departament d'educaziun, cultura e protecziun da l'ambient